Горивата поскапуваат за 4,85 насто: литар дизел – 98 денари

Од полноќ бензините поскапуваат за 4,50 денари за литар, дизелот за 6,50 денари, а екстра лесното масло за домаќинство за 6 денари. Регулаторната комисија за енергетика (РКЕ) ги зголеми максималните малопродажни цени на нафтените деривати во просек за 4,85 насто.
Еуросупер БС-95 ќе се продава по максимална цена од 91,50 денари, а еуросупер БС-98 ќе чини 93,50 денари за литар.
Најголемо поскапување има кај дизелот. Литар еуродизел БС (Д-Е V) ќе се точи за 98 денари. Новата цена на екстра лесното масло за домаќинство е 98,50 денари за литар.
Кај мазутот зголемувањето е значително помало – за 0,188 денари за килограм, со што максималната цена достигнува 43,726 денари за килограм.
Според РКЕ, повисоките цени се резултат на растот на референтните цени на нафтените деривати на светскиот пазар. Во споредба со претходната пресметка, бензините поскапеле во просек за 8,983 насто, дизелот за 10,979 насто, а екстра лесното масло за 9,801 насто. Кај мазутот растот е 0,871 насто.
Во исто време, курсот на денарот во однос на доларот, според кој се формираат цените, е понизок за 0,2247 отсто во однос на претходната пресметка.
И натаму се применува намалената акциза. Кај бензините еуросупер БС-95 и еуросупер БС-98 таа е намалена за 2 денари за литар, а кај дизелот за 4 денари за литар.
РКЕ посочува дека утврдените цени се максимални, односно трговците на големо и мало можат да продаваат горива и по пониски цени.