Генерали Инвестментс: Малку црвено на пазарите на капитал

Тимот на Генерали Инвестментс подготви резиме за актуелните настани кои влијаат врз пазарите на капитал.

Силен раст на пазарите на капитал годинава

Сезоната на летни одмори полека привршува. Во последните две недели можеше да се земе воздишка и малку црвена боја на пазарите на капитал. Растот годинава беше силен и како и секогаш, во одреден момент, кога приносите се доволно високи, инвеститорите почнуваат да се преиспитуваат дали да ги задржат позициите или да преземат ризик, поточно да искешираат дел од добивката и со тоа да го намалат ризикот. Не смееме да заборавиме дека и пресвртот што се случи на крајот од минатата година беше ненадеен, брз и дека главно се базираше на очекувањата за промена на монетарната политика на најголемите централни банки. Денеска сме во ситуација кога сите инвеститори прашуваат дали овие постулати или претпоставки сè уште важат или повеќето аргументи веќе се вкалкулирани во цените и со тоа истрошени. Се чини дека инвеститорите повеќе се приклонуваат кон овој последен заклучок. Значи пауза е во ред. Не е исклучена и корекција. Конечно, растот на пазарите на капитал го надминува развојот на економијата, а капиталните инвестиции, особено технолошките акции, повторно станаа скапи. Од друга страна, централните банки веќе некое време ја намалуваат достапноста на парите. Масовните програми за купување обврзници кои на некои места се појавија само со пандемијата, а на други траеја целата последна деценија од финансиската криза од 2008 година наваму, горе-долу завршија. Каматите нагло се зголемија за краток временски период. Но, иако заострувањето на финансиските услови е горе-долу завршено, последиците за реалната економија се уште добро се одразуваат. Централните банкари ќе кажат повеќе на крајот на неделата на нивниот годишен состанок во Jacskon Hall, но очекувањата се дека (речиси) повеќе нема да има повлекувања. Поради повисоките каматни стапки, пукнатини се појавуваат во секторот недвижности, кој е голем и важен сегмент на пазарите на капитал. Компаниите, особено помалите и новите претпријатија, потешко доаѓаат до финансиски ресурси. Ова е видливо во значителниот пад на новите котации на акции на светските берзи и издавањата на корпоративни обврзници од оваа година, во споредба со претходните години. Пониската економска активност се рефлектира во економските показатели и пониските стапки на раст на БДП. Борбата против инфлацијата без влијание врз економската активност за жал не е можна. Но, „страдањето“ носи резултати. Инфлацијата се намалува, но во исто време пазарот на труд останува силен, што значи дека се соочуваме со т.н. „меко слетување“ што беше идеален и најпосакуван исход во сите сценарија. Америка е поуспешна во борбата против инфлацијата од Европа, а успорувањето на економската активност во Европа е поголемо отколку во САД. САД е во подобра позиција од Европа, но и двата економски блока во моментов се во многу подобра позиција од Кина, која го претставува најголемиот дел од колачот на новите пазари.

Кинеската берза е една од најлошите годинава

Во последните недели, лошите економски вести често се поврзуваа со Кина. Кинескиот модел на раст, кој се засноваше на индустриски раст, градење недвижнини и производство на производи за остатокот од светот, очигледно пропадна. Западот сака да прави скапи и клучни производи, кои носат висока маржа, сами по себе, дома. Евтините масовни производи делумно се преселуваат во други, поевтини земји, често во Индија. Населението забрзано старее, но и покрај се, поради промените во економијата се повеќе млади луѓе не можат да најдат работа. Откако земјата се отвори кон светот во овој милениум и им овозможи на своите граѓани поголема слобода, се чини дека земјата повторно брзо се затвора. Со помош на државата, му овозможи на пазарот да развие некои големи технолошки компании кои се способни да се натпреваруваат со американските и европските гиганти. Но, во одреден момент, властите се исплашија од моќта на овие компании и го запреа нивниот раст и моќ. Историјата многупати не научи дека компаниите што се водат со државни декрети не се успешни. Ова доведе до бегство на капиталот, особено на западниот капитал, од инвестициите во кинески акции. Затоа, кинеската берза е една од најлошите оваа година. Индија, која станува еден од ретките преостанати атрактивни големи пазари во развој, докажува дека се може и поинаку.

Неколку добри приказни на локалните пазари во развој летово

Имаше и некои добри приказни на локалните пазари во развој ова лето. Една од нив е приватизацијата на романската компанија за електрична енергија Хидроелектрика со исклучиво обновливи извори на енергија. Ова е дури и најголемата прва продажба оваа година во Европа, која во исто време ги штиклира сите барања за одржливо инвестирање и како награда носи профитабилно инвестирање дури и за малите инвеститори. Со ова Романија брзо станува атрактивен и безбеден пазар во развој.

СОВЕТИ ЗА ИНВЕСТИТОРИТЕ

Политиките на централните банки остануваат главен двигател на пазарите на капитал. Инфлацијата се ублажува, но централните банки најавуваат дека, поради постојаната базична инфлација, сè уште се можни натамошни зголемувања на каматните стапки. Пазарот на труд е силен и економијата останува на територијата на раст. Мекото приземјување сега стана основно сценарио. Инвеститорите и понатаму очекуваат пресврт на каматната политика во 2024, за што централните банки не коментираат и следствено претставува ризик за пазарите. Глобалните, а соодветно на тоа и американските акции остануваат релативно скапи и главно поради тоа остануваме малку повнимателни со инвестициите во акции. Инвестициите во обврзници добиваат на сила во такво опкружување. Неопходно е да се задржи долгорочен пристап со периодично зголемување на инвестициите. Диверзификацијата на портфолиото останува клучен двигател за одржување и зајакнување на заштедите. Комбинација од акциски фондови како што се Генерали Топ Брендови, Генерали Америка и паричниот фонд Генерали Кеш Депозит, ги нуди најдобрите решенија за сложениот коктел на актуелната политичка ситуација и економското опкружување. Тоа исто така носи одредени можности. Американските акции во моментов изгледаат поатрактивни поради зголемениот удел во технолошки акции, но повиците за (пре)скапи технолошки акции стануваат се погласни. Во овој момент, има смисла да се пренасочат дел од средствата од технологијата или американските акции во други инвестиции, вклучително и оние со фиксен приход (обврзници). Поради зголемените очекувања за нов стимулативен пакет од кинеските власти, се зголемува и веројатноста за шпекулативен скок на цените на кинеските акции. За инвеститорите кои сакаат да ризикуваат повеќе, ова може да биде моментот да додадат некои кинески инвестиции во портфолиото, особено преку фондот Генерали БРИК. Но, бидете внимателни да не надминете 10% од портфолиото, бидејќи тоа е прилично ризичен пазар.