Аналитика
Етер вети дека ќе се подобри. Вети дека ќе оди на следното ниво, надминувајќи ги крипто ривалите, па дури и надминувајќи го кумот, биткоинот. Криптовалутата бр.2 требаше да биде неколку недели подалеку од „спојувањето“,односно трансформативна надградба на нејзиниот блокчејн Етереум за да ја направи побрза, поевтина и помалку гладна за енергија, со што ќе ја одржи перспективата за посилна и почиста крипто иднина.
Очекувањата го поддржаа етерот оваа година, дури и тогаш кога инфлацијата и монетарното затегнување го оковуваа биткоинот. Но, тоа спојување – кое ќе доведе до транзиција на рударењето на криптовалутатат етер од енергетско-интензивниот метод на докажување на работа во доказ за удел – беше одложен, фрустрирајќи ги инвеститорите. „Временската рамка за гледање на ова лансирање и понатаму се одложува“, вели Брендан Плејфорд, основач и извршен директор на платформата за децентрализирани финансиски податоци Маса Фајнанс. Тој смета дека мошне очекуваната надградба на Етереум би можела повторно да биде одложена со оглед на тоа што оваа транзиција е многу комплицирана и сè уште неизвесна за тоа дали навистина може да го исполни ветувањето за намалување на трошоците и зголемување на брзината на трансакцијата.
Криптовалутата етер падна за 8% од 3.215 долари на 2.947 долари на 11 април, денот кога водечкиот развивач на Етереум, Тим Беико, на Твитер објави дека пуштањето во јуни е одложено додека продолжуваат тестовите. Тој е намален за 13% овој месец, на 2.844 долари. „Нема да биде јуни, но веројатно во неколку месеци потоа“, напиша Беико во својот твит. „Сè уште нема цврст датум, но дефинитивно сме во последното поглавје“.
Времето на спојувањето – ланецот EH1 на Етереум ќе се спои со нов синџир за да се создаде ETH2 – останува нејасно, иако многу набљудувачи на крипто очекуваат тоа да се случи некое време оваа година. Пазарната капитализација на етер од 363 милијарди долари е помалку од половина од биткоинот, и заедно сочинуваат 60% од крипто-пазарот.
Сепак, биткоинот останува само инвестиција без вистинска можност да се користи за договори во децентрализирани финансиски апликации. Поради оваа причина, многу инвеститори веруваат дека промената на пазарот е неизбежна – наречено „превртување“ во крипто круговите – при што спојувањето делува како катализатор за етереумот да стане доминантна платформа.
„Гледаме дека средствата ротираат во етереум како подготовка за спојувањето, иако не знаеме кога тоа ќе биде“, рече Ноел Ачесон, шеф на пазарните увиди во Џенезис Трејдинг. Интересот за купување, рече таа, „навести дека се чини дека повеќе средства го ценат тоа што етереумот е можеби потценет во оваа фаза“.
И биткоинот и етерот се ископуваат или се произведуваат со помош на методот на доказ за работа (POW), каде што илјадници рудари или мрежни јазли се натпреваруваат за решавање на сложени математички загатки.
Ова е процес на масовна конзумација на енергија, кој се проценува дека секоја година предизвикува повеќе загадување колку една помала држава, поттикнувајќи стравови за тоа како криптоверзумот ќе се снајде во светот со ниска содржина на јаглерод.
Алтернативниот метод за докажување на влогот (POS) користи многу помалку енергија бидејќи, наместо да се тркаат милиони компјутери да обработуваат загатки, тој им овозможува на јазлите кои вложуваат најмногу монети да ги потврдуваат трансакциите.
Етереумот долго време беше закочен поради проблеми со брзината и трошоците за обработка. Обработува само 30 трансакции во секунда како блокчејн доказ за работа, но очекува да обработи дури 100.000 трансакции во секунда откако ќе се пресели во ПОС.
Тоа ќе му овозможи да се натпреварува со други, помали алткоини како Солана и Кардано, кои користат ПОС делумно или целосно, за децентрализирани финансиски апликации како што се тргување, инвестирање, позајмување, па дури и незаменливи токени. Тоа е под услов етереумот да ја добие својата надградба.
„Луѓето кои веруваат во „превртувањето“, веруваат дека ќе дојде многу наскоро“, рече Ачесон. „Но, тоа е само теорија и останува да се види“.
