Таргет Груп: Ковид кризата им стави клуч на врата. Кои се македонските фирми кои не ја преживеаа 2020-та?

Минатата година во Македонија клуч на врата ставиле 6.213 фирми. Оваа бројка е за 999 правни субјекти помала во однос на претходната 2019 година кога започна ковид кризата, покажуваат податоците од анализата на Таргет Груп, експерти во областа на управување со деловни податоци.

“Од тука може да се заклучи дека кризната година влијаела позитивно врз одржување во живот на скоро 1.000 компании повеќе во споредба со 2019 година. Ако се земе во предвид фактот што најчесто компаниите вработуваат до 5 лица, може да резимираме дека најмалку 5.000 луѓе ја искористија шансата за задржување на работниот однос, а исто така во иста мера позитивниот ефект се одразува и врз националниот БДП и даночните приходи”, се посочува во анализата.

Од 22 сектори во кои се распределени компаниите, само во 8 сектори забележан е пораст на бројот на згаснати компании. Тука акцентот се става врз секторот Стручни, научни и технички дејности, Дејности на социјална и здравствена заштита и останати услужни дејности. Според  статистичките податоци на Таргет Груп, ситуацијата е следна:По сектори кај уметноста и забавата падот е 36%, рударство и вадење камен 47 отсто, земјоделство и шумарство 13,5 проценти, снабдување со вода 30 отсто.

Од аспект на правната форма најголем број на згаснати компании во 2020 се ДООЕЛ и нивниот број изнесува 3.950. Сепак, споредено со годината пред тоа 2019 оваа бројка е помала за 17,5 проценти. Токму ДООЕЛ заедно со ТП,Подружница,Непознато и ДОО ја сочинуваат четворката која бележи подобрување минатата година. Останатите четири правни форми имаат поголем број на згаснати фирми, а прва на листата е Друго со 824 згаснати субјекти.

Од општините Битола, Крива Паланка, Тетово и Штип се со најмногу затворени компании. Предводник на листата е Штип со 36 повеќе згаснати компании споредено 2020 со 2019. Следуваат Битола со 22, Крива Паланка со 14 и Тетово со 11 компании. Во овие четири градови бројката на затворени компании изнесува дури 943.

Ковид кризата полесно лани ја прележале компании од Скопје, Прилеп, Кавадарци, Гевгелија и Велес.