Аналитика
За петнаесеттина дена македонските пензионери ќе ја добијат мартовската пензија зголемена за 8,4 проценти. Со нивното пресметување во досегашните износи, просечното пензионерско примање од 17.666 се поместува на 19.150 денари. Бидејќи корекцијата е линеарна, корисниците на најниските пензии ќе добијат 921 денар плус. А, за 75 пензионери кои имаат највисоки примања, растот ќе донесе уште 5.400 денари.
Очекувано, најнизок е просекот кај земјоделските пензии – 8.491 денар. Највисоката, пак, пензија исплатена за јануари е 64.394 денари.
За првиот месец од годинава пензии биле поделени на 329.354 лица. Најбројни меѓу нив се корисниците на старосна пензија – 227.086, на семејна пензија 74.399, а на инвалидска пензија 27.869.
Според јануарските податоци на ПИОМ, во земјава има 70.428 приматели на најниски пензии, кои се во распон од 10.975 до 14.068 денари. Гледано според висината на пензијата по групи, состојбата е: со примања до 12.000 денари се 89.137 лица, до 16.000 – 8.446, до 20.000 – 59.195, а пензии повисоки од 20.000 денари коростат 94.576 пензионери.
Во категоријата највисоки пензионерски примања има 1.444 лица. Од нив, 72 имаат пензија од 47.823 денари, 58 од 44.561.00, 907 – 46.421, по 58.337 денари примаат 42 пензионери, по 57.981 – 44, по 57.839 – 50, по 59.472 – 53, по 60.430 – 77, по 63.732 – 66 и 75-на се корисници на највисоките 64.394 денари.
Оттука и реакциите на пензионерите. Од една страна се согласуваат со тоа дека усогласувањето на пензиите со движењето на цените и со просечната плата, кое се врши два пати годишно, на први март и на први септември, дава сигурност дека корекции ќе има во континуитет. Но сепак, сметаат дека поправедно е да се пристапи кон скалесто зголемување, каде што најмногу ќе добиваат пензионерите со ниски примања.
Воедно, сметаат дека во актуелните услови процентите за зголемување нема да значат ништо, доколку не се намалат цените на прехранбените артикли.
Пензионерското секојдневие не е лесно ниту за пензионерите од другите земји на Балканот. Просечната пензија во Србија е 322 евра, односно по јануарското зголемување од 12,1 насто, најниските примања се близу 176, а највисоките 1.620 евра. И таму е најмала земјоделската пензија – 138 евра.
Корекции од 2,5 насто кај пензиите направи и Црна Гора, при што со редовното усогласување пензионерите добиле плус шест евра. Од почетокот на годинава утврдената минимална пензија е 270 евра. Црногорските пензионери се незадоволни и бараат минимумот да биде 350 евра. Инаку, таму пензиите се усогласуваа три пати во текот на годината, а се движат од 147 до 1.100 евра.
Просечната пензија во Босна и Херцеговина, по усогласувањето од 11,1 процент, е 316 евра. Најниската јануарска пензија изнесува 252, а највисоката 1.233 евра. Во БиХ има 435.829 пензионери.
Најниски се пензионерските приходи на жителите на Косово. Конкретно, според достапните податоци, пензиите се движат од 90 до 630 евра.
Состојбата е поинаква кај двете членки на ЕУ. Во Хрватска има 1.226.775 корисници на пензија. Просекот е 588,40 евра. А, во Словенија – 820 евра, со тоа што таму покрај последното зголемување од 5,2 насто, за први април се најавува и вонредно усогласување од 3,5 проценти. Инаку, има и годишен надомест на различни нивоа, а за оние со пониски пензии – до 600 евра предвидени се дополнителни 455 евра.
