Генерали Инвестментс: Пауза од берзанскиот бик

Тимот на Генерали Инвестментс подготви резиме за актуелните настани кои влијаат врз пазарите на капитал.

Пазарите ги проголтаа потезите на централните банки и кварталните резултати

Бикот на берзите изгуби малку на динамика минатата недела. Во отсуство на важни економски податоци, пазарите главно размислуваа за последните потези и комуникацијата на централните банки, како и за кварталните резултати на берзанските компании. Индексот S&P 500 загуби 1% и ја означи својата најлоша недела оваа година. Релативно мирните движења на берзите упатуваат на тоа дека берзанските индекси се нашле на крстопат, бидејќи инвеститорите одмеруваат дали може да продолжи стабилното закрепнување на курсевите или пак растот во последните недели е претеран со оглед на економските, а пред се, монетарни Услови.

Деловните резултати во последниот квартал од минатата година досега ги презентираа повеќе од две третини од компаниите од индексот S&P 500, од ​​кои 70% ги надминаа прогнозите на аналитичарите. На прв поглед, ова е охрабрувачка бројка, но не треба да доведе до заблуда. Во просек од последните три години, дури 79 проценти од компаниите кои се дел од индексот на најголемите 500 американски берзански компании ги надминале прогнозите. Истовремено, прогнозите за добивката во првиот квартал од оваа година се намалени во просек за 3,3%. Сепак, се чини дека и оваа сезона на објавување резултати ќе помине без поголеми потреси, што е доволно да ги задоволи очекувањата на инвеститорите во моментов.

Грешката со вештачка интелигенција скапо го чинеше Google

Американските берзански индекси надолу ги повлекоа акциите на матичната компанија на Google – Alphabet, чија вредност падна за 10% изминатата недела. Цената на акциите се лизна откако Google минатата среда ја претстави програмата за разговор со вештачка интелигенција наречена Bard. Програмата одговара на прашањата на корисникот во прелистувачот на Google на разговорен начин, имено со наоѓање онлајн информации за поставеното прашање и врз основа на тоа, му дава одговор на корисникот. Но, таа веќе потфрли во демо видеото на Google, во кое Bard даде делумно погрешен одговор на поставеното прашање. Се очекува вештачката интелигенција да биде еден од клучните фактори на технолошкиот развој во блиска иднина, па инвеститорите внимателно ја следат трката за доминација на ова поле.

Русија ќе го намали производството на нафта, цените на гасот продолжуваат да паѓаат

Ги следевме нешто повеќе настаните на пазарите на обврзници и енергија. Бараните приноси на најследените државни обврзници повторно благо скокнаа. Причината главно се бара во прогнозите на централните банкари, кои се повеќе предупредуваат дека очекувањата на пазарот за неизбежно намалување на каматните стапки се премногу оптимистички. Кривата на принос на американските државни обврзници останува изразено инверзна, што значи дека инвеститорите бараат повисок принос за обврзниците со пократок рок на доспевање отколку за обврзниците со подолг рок на доспевање.

Иако во последниот неделен извештај пишувавме за падот на цената на нафтата, минатата недела цената на црното злато повторно се искачи на 80 американски долари за барел. Порастот на цените беше резултат на веста дека Русија ќе го намали производството за 500.000 барели дневно почнувајќи од март како одмазда за воведувањето ограничување на цената на нивната нафта, што претставува околу 5% од количината на нафта што Русија моментално ја испумпува и 0,5% од нафтата на глобално ниво. Но, цените на природниот гас во Европа продолжуваат да се намалуваат и паднаа на околу 50 евра за мегават час за испорака следниот месец и под 6 евра за мегават час за испорака следната година. И двете се далеку под есенските рекорди и значително ги подобруваат економските очекувања во Европа за 2023 година.

СОВЕТИ ЗА ИНВЕСТИТОРИТЕ

Макроекономските податоци и понатаму се слаби, но последните недели покажаа знаци на благо закрепнување. Инфлацијата се стабилизира и е во надолен тренд, пазарот на трудот останува многу силен, а како резултат на тоа, централните банки покажуваат желба за заострување на монетарната политика. Очекувањата на инвеститорите за неизбежен пресврт во политиката на каматните стапки се во спротивност со реториката на централната банка и остануваат ценети на пазарните нивоа. Ваквото оптимистичко сценарио претставува ризик за пазарите. Сезоната на објавување на резултатите за последниот квартал од 2022 година се приближува кон крајот и не ги разочара инвеститорите. Досега, прогнозите за 2023 година не се толку песимистички колку што се очекуваше пред неколку недели. Подоброто расположение се враќа и на пазарите во развој. Отварањето на Кина дава надеж дека најлошото е зад нас. Со оглед на сите предизвици и очекувани промени, акциите не се евтини, но одредени сегменти на пазарот сепак нудат можности, бидејќи иднината или очекувањата на инвеститорите за тоа како треба да изгледа иднината се менуваат многу брзо. Препорачуваме да се задржи долгорочен пристап со периодични зголемувања на инвестициите, што се покажа дека дава добар одговор и најдобар резултат во услови на поголема нестабилност и привремена неизвесност. Диверзификацијата на портфолиото останува клучен двигател за одржување и зајакнување на заштедите. Комбинација од акциски фондови како што се Генерали Топ Брендови, Генерали Америка и паричниот фонд Генерали Кеш Депозит, ги нуди најдобрите решенија за сложениот коктел на актуелната политичка ситуација и економското опкружување. Тоа исто така носи одредени можности. Оние кои имаат поголема позиција во технологијата или одредени други сегменти во нивното портфолио можат да го искористат овој пораст за да ги реконструираат своите портфолија. Генерали БРИК сепак, останува многу шпекулативна инвестиција, бидејќи кинеската држава редовно и често ја менува сликата за иднината што ја предвидуваат инвеститорите, што со себе носи силни флуктуации. Обврзниците ја имаа најлошата година (2022) во последните 50 години. Не веруваме дека тоа може да се повтори во 2023 година, напротив, полека ќе почне да се гради можност за инвестирање. За трпеливите инвеститори ова се моментите за почнување на градење на позиции. Времињата се непредвидливи и ќе се појават можности. Последното отскокнување покажува дека пазарот е непредвидлив и дека се потребни постепени и методички чекори во прилагодувањето на инвестициското портфолио, бидејќи чекањето за оптимален момент води до можност за пропуштање на силни скокови. Отскокнувањето не значи дека кризата е завршена и дека не е можно ново дно. Тоа само покажува дека да се биде премногу самоуверен во една приказна и како резултат на тоа да се има неизбалансирано портфолио може да биде опасно.