Зошто флексибилноста е клучна предност на работата на далечина

Во денешното брзо темпо на живот, флексибилноста веќе не е луксуз, таа е неопходност. За многумина од нас, традиционалната работа од 9 до 17 часот се чини застарена и ограничувачка. Посакуваме слобода да работиме од каде што се чувствуваме најпродуктивни, било да е тоа дома, во кафе бар или на некоја далечна локација. Како работник на далечина, забележав дека оваа флексибилност не само што го промени начинот на кој работам, туку и го подобри целокупниот квалитет на мојот живот.

Извор: Image by freepik

Како започнав да работам на далечина

Започнувањето со работа на далечина не беше воопшто лесно. Пораснав верувајќи дека за да бидеш продуктивен и да те сметаат за вреден работник, мора да имаш традиционална канцелариска работа. Но, идејата да работам од било каде и да го распоредувам своето време според моите потреби ме привлече кон овој начин на живот. Почнав со мали чекори и првата година работев хибридно, една работа 4 часа во канцеларија и друга работа 4 часа на далечина. Со текот на времето, целосно преминав на работа на далечина и сега барам само работни позиции или проекти што може да се извршуваат на далечина. Се навикнав на флексибилноста и слободата, така што би ми било тешко да го променам тој ритам.

Флексибилноста како најголема предност

Една од најголемите придобивки од работата на далечина е флексибилноста што ја нуди. Повеќе нема ригидни распореди и долги патувања до работа. Наместо тоа, можам да го организирам својот работен ден околу моите најпродуктивни часови, да правам паузи кога ми се потребни и да менаџирам со работните задачи на начин што најмногу ми одговара. Ова ниво на автономија не само што ме направи поефикасна, туку ми овозможи и подобар баланс помеѓу работата и приватниот живот.

Слободата да работам од било каде е уште една голема предност. Без разлика дали ќе одлучам да работам од дома, во локално кафе или да посетам и истражувам друг град, можам да останам поврзана со тимот и продуктивна. Работа на далечина значи дека повеќе не морам да чекам одмор за да патувам. Можам да ја понесам работата со себе, да искусувам нови култури и средини без да го жртвувам работното место. Оваа флексибилност ми овозможи да живеам поисполнет живот, каде работата и патувањата можат хармонично да коегзистираат. Избирањето на овој начин на живот ми отвори нови можности и ме поврза со луѓе со слични размислувања ширум светот. Поставување граници, добра организација и ефективна комуникација се клучните алатки кои ми помогнаа да воспоставам успешна рутина за работа на далечина што мене ми одговара.

Извор: Image by senivpetro on Freepik

Работењето од далечина направи повеќе да ја сакам мојата работа

Откако преминав на работа на далечина, забележав значително подобрување во задоволството од мојата работа. Способноста да го прилагодам своето работно опкружување според моите потреби, дали тоа значи да работам во тишина или со музика во позадина, да седам на биро или да се опуштам на кауч, ме направи попродуктивна и пофокусирана. Имам помалку стрес, повеќе сум ангажирана и креативна, што придонесе за повисоко ниво на задоволство од работата.

Работата на далечина ми даде и слобода да го приоритизирам своето здравје. Можам да планирам тренинзи во текот на денот, да подготвувам здрави оброци и да правам кратки прошетки за да се освежам. Без секојдневното патување до работа, имам повеќе време за важни работи, како поминување време со саканите, уживање во моите хобија или едноставно одмарање. Овој баланс ме направи посреќна и поздрава, како физички така и ментално.

Неколку совети за успешно да работите на далечина

Важно е да најдете рамнотежа помеѓу флексибилноста и структурата за да бидете успешни и задоволни со работењето на далечина.

• Воспоставете јасна и детална комуникацијасо тимот преку онлајн алатки за редовни проверки и ажурирања, со цел да избегнете недоразбирања.
• Практикувајте самодисциплина и добро управување со времето. Осигурете се дека ги приоритизирате задачите, планирајте тренинзи, правете паузи и јадете здраво.
• Пријавете се налокални настани за вмрежување и закажувајте редовни тимски состаноци за да избегнете чувство на осаменост.
• Лесно е работата да навлезе во вашето лично време кога работите од дома. Поставете јасниграници, како исклучување на работните известувања по работното време, за да го одржите балансот помеѓу работата и приватниот живот.
• Фокусирајте се на резултатите, а не на одработените часови. Приоритет на работата на далечина е задачите да бидат квалитетно завршени, а не само да се бројат одработените часови. Фокусирајте се на квалитетот на работата и почитување на роковите, што е повредно отколку едноставно да бидете онлајн цел ден.
• Препознајте ги и прославете ги вашите успеси, и големи и мали. Признавањето на вашите постигнувања ве мотивира и одржува позитивни додека работите на далечина.

Founders’ night настан, Јавна Соба, 16.03.2022, Скопје

Како Импакт Фондација успешно функционира со работа на далечина

Во Импакт Фондација, работиме целосно на далечина веќе неколку години и нашето искуство покажа дека работата на далечина може да биде и ефективна и ефикасна кога е правилно организирана. Нашиот тим се потпира на сет алатки и добро структурирана комуникација за да останеме поврзани и продуктивни, сето тоа додека придонесуваме кон поодржлив начин на работа.

Користиме Google Workspace за соработка на документи, споделување на датотеки и комуницираме преку Google Meet. Оваа платформа ни овозможува беспрекорно управување со задачите и проектите без потреба од физички канцелариски простор, со што ја намалуваме потрошувачката на енергија.

За управување со проекти, се потпираме на Asana, која ни помага да ги следиме тековните проекти, да поставуваме рокови и да осигураме дека сме усогласени со нашите цели. Asana ни овозможува да ги разложиме сложените задачи на помали, управливи чекори, што го олеснува следењето на напредокот и исполнувањето на целите без потреба од хартиени процеси.

Неделните координативни состаноци се темел на нашата стратегија за работа на далечина. Овие состаноци осигуруваат дека сите си ги знаеме своите одговорности, дискутираме за сите предизвици и го планираме претстојниот период. Оваа рутина помага да се одржи структурата и одговорноста додека се минимизира потребата од патување.

За внатрешна комуникација, главно користиме маил и Viber. Viber ни служи како брз и неформален начин за комуникација, особено за итни прашања или тимски најави. Оваа комбинација на алатки ни овозможува да останеме одговорни и да одржуваме постојан проток на информации во тимот, додека ја намалуваме зависноста од физичка канцеларија.

Извор: Image by gpointstudio on Freepik

Кога размислувам за моето искуство како работник на далечина, чувствувам голема благодарност за слободата да работам од било каде. Од живописните кафе-барови во Амстердам до мирните плажи во Грција, можностите се неограничени. Чувството на ослободување што доаѓа со можноста да го изберам моето работно опкружување е навистина непроценливо. Ова ми овозможи да истражувам нови култури, да се поврзам со различни луѓе и да ја ослободам својата креативност на начини што не сум ги ни замислувала.

Затоа, додека продолжувам по патот на работа на далечина, со нетрпение очекувам да видам каде ќе ме однесе следно. Светот е моја канцеларија и подготвена сум да ги прифатам сите можности што ќе ми се појават. Работата на далечина не е само тренд, тоа е начин на живот кој нуди ослободување какво што никаде на друго место нема да најдете. Па, што ве спречува да го истражите овој начин на живот? Слободата да работите од било каде може да биде вашата следна авантура.

Автор на текстот: Андријана Серафимовска

Андријана Серафимовска е асистент за комуникации во Импакт Фондација. Амбициозна и мотивирана индивидуа, со страст за волонтирање за да се подобри квалитетот на живот на лица од маргинализирани групи. Таа има искуство во управување со проекти за невладини организации и маркетинг на социјалните медиуми.

Целиот текст е достапен тука