Аналитика
Одредени се највисоките цени на 11 видови овошје и зеленчук кои ќе се продаваат од петти до 30 април, информираше министерот за економија, Крешник Бектеши. Според последната владина одлука, цената на доматите не смее да оди над 70 денари, краставиците до 75, кромидот – 60, карфиолот – 70, зелените пиперки 90, гравот 75, леќата 110, бананите 70, портокалите 55, мадарините 60, лимоните најмногу до 55 денари. Овие цени мора да се почитуваат и во маркетите и на зелените пазари, а спроведувањето на одлуката ќе ја контролира Државниот пазарен инспекторат во координирана соработка со УЈП и со МВР.
Според податоците на Министерството за економија, рече Бектеши, инфлацијата, како и цените на прехранбенте производи и на енергенсите се стабилизирани и има намалување во однос и на претходните месеци и на претходната година. Со поконкретни показатели ќе излезе Државнот завод за статистика на седми месецов.
Воедно, наведе дека во соработка со Министерството за земјоделие и со Царинската управа се направени анализи за овие производи, при што се утврдило дека има маржи кои се движат и до 250 проценти. А во одредувањето на цените се пресметани сите трошоци, така што во случајот никој нема да биде оштетен. Оттаму, ги повика сите трговци и увозници целосно да ја почитуваат олуката, која е краткотрајна, само 25 дена. Конкретно, ќе се применува до мај, кога на пазарот ќе се појават домашните производи, па Бектеши очекува цените дополнително да се намалат.
Горан Трајковски, директорот на ДПИ, истакна дека од првата одлука, па досега, извршени се повеќе од 1.800 надзори, издаени се над 20 прекршочни палатни налози, со што прекршителите треба да платат повеќе од 2,5 милиони денари. Тој повтори дека казните се високи, од 800 до 10 илјади евра, а никој не смее да биде над законот. Имињата на оние 20 субјекти кои не ги замрзнале цените и не обезбедиле доволна снабденост, ќе бидат објавени по завршувањето на постапката.
