Аналитика
На трговците им се забранува да ги нудат на акциска и на промотивна продажба прехранбените и земјоделските производи. Одлуката, која е со важност до 30 ноември, е донесена на владина седница, а по предлог на Министерството за економија.
Одлуката не ги опфаќа алкохолните и безалкохолните пијалаци.
„Оваа одлука е донесена согласно членот 29 став 1 алинеја 3 од Законот за трговија, за нарушување на домашниот пазар. Одлуката е донесена со цел да се спречи злоупотреба во прометот на одделни производи и стоки“, наведено е во владиното соопштение.
Со оваа одлука ќе се намалат можните манипулации при ваквиот вид на продажба. Исто така, ќе се намали и ќе се спречи нарушувањето на домашниот пазар заради злоупотреба во прометот на одделни производи и стоки.
„Одлуката е со цел граѓаните да ја знаат точната и реална цена на производот, и да не се доведуваат во заблуда со цените на прехранбените производи. Одлуката ќе се применува до 30 ноември 2023 година“, посочуваат од Владата.
