За акционерите на „Усје“ дивиденда од над 22 милиони евра

Дивиденда од над 22,1 милион евра им следува на акционерите за успешното работење на скопската Цементарница „Усје“ во текот на минатата година. Износот е формиран од два дела, од ланската и од реинвестираната добивка од 2017 година. Износите ќе се пресметуваат врз сума од 2.415 денари за акција.

Предлогот кој акционерите треба да го изгласаат на Собранието закажано за 23 мај предвидува од остварената добивка за 2023, од 1.509.491.955 денари (над 24,5 милиони евра), за дивиденда да се издвојат 1.098.327.991 денар (над 17,8 милиони евра). Кон тоа се додава реинвестираната добивка од 2017, која изнесува 263.210.364 денари (близу 4,3 милиони евра).

Последен ден на тргување со право на дивиденда е 10 јуни. Акционерската листа ќе се утврди со датум од 12 јуни.

Минатогодишниот профит на компанијата во најголем дел е базиран на основниот производ, цементот, на пласманот на домашниот и на странските пазари. Од тоа остварување, речиси 6,7 милиони евра се насочуваат во реинвестирана добивка.