Аналитика
Во четвртокот, берзанските индекси значително се намалија откако пораснаа претходниот ден, бидејќи инвеститорите беа разочарани од слабите индикатори од пазарот на трудот во САД, а меѓу најголемите губитници повторно беше технолошкиот сектор.
Dow Jones падна за 405 поени или 1,45 отсто, на 27.534 поени, додека S&P 500 се спушти за 1,76 отсто, на 3.339 поени, а индексот Насдак падна за 1,99 отсто, на 10.919 поени.
Последните денови, пазарот беше под притисок поради корекција на цените на акциите во технолошкиот сектор. Во средата, секторот за прв пат порасна по три дена пад, но вчера заврши повторно со црвено.
Цените на акциите на технолошките гиганти како што се Епл, Микрософт и Амазон паднаа за повеќе од 2,8 проценти.
Секторот водеше во растот оваа година. Индексот на технолошкиот сектор S&P од почетокот на годинава се зголеми за околу 24 проценти, а целиот индекс на S&P 500 порасна за 3,3 проценти.
Во повеќето азиски берзи, индексите паднаа бидејќи технолошкиот сектор е под притисок и се намалија надежите за нови стимулативни мерки во американската економија.
Индексот на акции, со исклучок на јапонскиот, падна за 0,2 проценти околу 19:00 часот.
На берзата во Токио, индексот Никеи зајакна за 0,3 проценти, а цените на акциите во Хонг Конг и Сингапур пораснаа за истиот процент. Индексите на берзата во Шангај, Австралија и Јужна Кореја, пак, паднаа помеѓу 0,2 и 0,8 проценти.
