Аналитика
Инвестиција од над 126 милиони евра и повеќе од 180 работни места со плата далеку над државниот просек, ќе биде бенефитот од втората фабрика на германскиот фармацевтски гигант „Герејсхајмер“, чија изградба почна во ТИРЗ-2, Скопје. Ова е најголемото вложување досега забележано од основањето на технолошко-индустриските развојни зони. Во новата фабрика со високо-напредна технологија ќе се произведуваат специјализирани производи од медицинско стакло, шприцеви за вакцини и фармацевтски продукти за потребите на светски фармацевтски реномирани компании.
Среде најголемата светска енергетска криза, власта ги поттикнува инвеститорите да инвестираат и да креираат додадена вредност за македонската економија, со што нашите работници и нашиот кадар се чувствуваат ценети со висината на платите и условите, а имаат и можност преку дополнителни тренинзи да напредуваат во кариерата, наведе премиерот Димитар Ковачевски. Целта е граѓаните да останат во земјава и да имаат подобар животен стандард.
Премиерот ја посети првата фабрика на „Гересхајмер“, каде му беше презентиран современиот процес на производство на медицинска пластика во погоните, проект кој германскиот концерн го почна овде пред четири години.
Оттаму и податокот дека првичната инвестиција од 25 милиони е веќе зголемена на над 60 милиони евра. Според премиерот, ова покажува дека нашата земја е безбедна дестинација за инвестиции, партнерите ја препознаваат квалитетната понуда од кадар и знаење, па затоа државата ги помага инвеститорите со ослободување од даноци, поддршка на работните места и со сет од мерки кои го олеснуваат бизнис амбиентот.
Првичните анализи покажуваат дека на секој еден денар вложен од државата, компаниите вратиле четири денари назад во буџетот.
Инаку, во компаниите лоцирани во индустриските зони работат 16.400 лица. Што се однесува, пак, до ефектите, Ковачевски нагласи дека лани се отвориле 2.300 нови работни места, биле реализирани над 430 милиони евра нови инвестиции, а годината е заокружена со рекорден извоз од 3,7 милјарди евра.
На настанот присуствуваа директорот на ТИРЗ, Јован Деспотовски, Оливер Бургел, потпретседател на „Гересхајмер“, како и Ото Граф, привремен вршител на работите во Амбaсадата на Германија.
