Во понеделник 50, во петок 2.319 – колку акции се подарени минатата недела? 

Минатата недела се подарени или наследени 4.102 акции издадени од 14 компании. Ова е втора седмица по ред, во која ги нема банкарските харти од вредност. Кај нетрговските трансфери се бележи засилување на дневна основа – од 50 акции во понеделник до 2.319 во петок.

Првите два дена имало по еден трансфер. Понеделнички, активноста почнала со 50 акции на „Гранит“. Во статистиката на Централниот депозитар за хартии од вредност се влезени уште 427 обични акции на оваа компанија, чија сопственост била пренесена во четвртокот. Во вторникот, пак, се запишани 689 акции на „Македонски телеком“.

Во два наврати се трансферирани и 216 акции на прилепскиот „Тутунски комбинат“. Прво 134, па 82 обични акции.

Акциите на „Либерти“ АД Скопје се редовни во нетрговските трансфери, а често се издвојуваат и по бројноста. Така и овојпат – 875 обични акции.

Податоците на ЦДХВ што ги објавува Македонска берза покажуваат дека се трицифрени преносите направени со акциите на „Макстил“ – 604, на „АрцелорМиттал“ (ХРМ) – 525, на „Македонијатурист“ – 336 и на РЖ „Услуги“ – 222 обични акции.

Во минатонеделната статистика влегуваат и 55 акции на „Макпетрол“, 29 на „Уготур“. Застапени се и акциите на три фирми произлезени од некогашната скопска „Железара“ – 27 на РЖ „Интер-Трансшпед“, 26 на РЖ „Економика“ и 11 на РЖ „Техничка контрола“. Како и во речиси сите досегашни нетрговски трансфери, и сега ги има акциите издадени од „Алкалоид“, овојпат десет на број.