Во јануари 43.384 туристи оствариле 88.635 ноќевања

Во јануари државата ја посетиле 10,3 проценти повеќе туристи од истиот месец лани, при што и бројот на ноќевањата е зголемен за 1,8 насто, соопшти Државниот завод за статистика.

Од вкупниот број – 43.384, 43,2 се домашни, а 56,8 отсто странски туристи. Тие во јануари оствариле 88.635 ноќевања. Тука, процентот на наши гости и на странци е изедначен – 50:50.

Сепак, во однос на првиот месец од 2022, сега има намалување кај бројот на домашните туристи, и тоа за 9,8 отсто. Затоа, пак, државата ја посетиле за 32,9 насто повеќе странски турист. Тоа се покажува и кај статистиката на ноќевањата: десетпроцентен пад е забележан кај домашните гости, а кај реализираните од странските посетители има раст од 17 насто.

Податоците влеваат надеж дека во текот на годинава ќе се остварат плановите на Агенцијата за промоција и поддршка на туризмот – повеќе од 3,2 милиони ноќевања и над 430 милиони долари прилив од туристичката индустрија.