Аналитика
По успешно пребродената 2022, Стопанска банка а.д. Битола веќе работи на годинешните зацртани цели.
Како што се посочува од Банката, во услови кога на повидок е забавување на инфлацијата, на краток рок очекувањата се во насока на продолжена неизвесност поврзана со конфликтот во Украина и движењето на пазарот на енергенси. На среден рок, пак, се надеваат на одредено стабилизирање на макроекономското опкружување и умерено нагорно придвижување во економијата. Истовремено, битолската Стопанска банка ќе го прилагодува сопственото работење кон деловната клима и кон динамикaта на пазарот.
И во наредниот период Банката ќе биде ориентирана кон добро обмислено, стабилно и профитабилно оперативно работење. Секако, согласно сопствената деловна политика, развојниот и финансискиот план.
Фокусот е насочен кон јакнење на депозитниот потенцијал, понатамошно подобрување на вкупната актива преку засилено преземање интензивни мерки и активности за наплата на нефункционалните кредити, подобрување на квалитетот на кредитното портфолио, како и активности поврзани со продажба на преземениот имот и контрола на трошоците. Воедно, Банката ќе настојува да ја одржи динамиката на раст на приходните позиции во однос на динамиката на раст на расходите, што ќе создаде предуслови за профитабилно работење.
