Аналитика
За девет месеци продадени конци за плетење за повеќе од 4,5 милиони евра. Ветекс од Велес особено добро котира на странските пазари, од каде што се слеале 4,47 милиони евра. Во овој период вкупните приходи се зголемени за безмалку шест насто (5,96%).
„Зголемувањето на вкупниот приход е резултат на зголемената побарувачка за нашите производи од странските деловни партнери. Освен редовните приходи, се остваруваат и останати приходи од штети по основ на осигурување на основните средства и приходи од камати“, информираат од единствената македонска компанија што се занимава со производство на конци и предива.
Кој работи има и трошоци или повеќе деловни активности, повисоки расходи. Во случајот на Ветекс зголемени се за 6,1 насто на годишно ниво и достигнуваат над 4,3 милиони евра. Средствата завршиле во суровини и материјали за производство, во електрична енергија, мазут и за плати и надоместоци на вработените.
Оттаму и добивката од околу 174 илјади евра.
Последниве години Ветекс бележи сѐ подобри деловно-финансиски резултати. За успешното ланско работење, акционерите годинава поделија дивиденда од 184 илјади евра. Интересен е и податокот дека во 2024 година компанијата успеа да ја зголеми добивката за 177,33 насто – од 107,4 илјади (2023) на 297,8 илјади евра. Според податоците од Бизнис Мрежа, за таа една година приходите нараснале за 13,43 насто, а нето-профитната маржа за 139,51 насто (од 2,08 % на 4,98 %). Тоа е заслуга на 118-те вработени, на кои лани просечната плата им била зголемена за 22,2 насто и достигнала 33.934 денари.
Ветекс, кој на пазарите се потврдува повеќе од пет децении, најголемиот дел од производството го насочува кон Германија, Австрија, Италија, Данска, Холандија, Франција и Швајцарија. Што се однесува до работењето предвидено за последново тримесечје, наведуваат дека исполнувањето на планот за производство ќе се одвива според барањата на пазарот, техничките можности и капацитетот на претпријатието.
М.А.
