Аналитика
Од јануари до мај годинава државата направила увоз на стока во вредност од 4,64 милијарди евра, а извезла за 3,24 милијарди евра. Трговскиот дефицит е 1,4 милијарди евра. Најмногу вакви активности Македонија имала на релациите со Германија, Велика Британија, Грција, Србија и Кина.
Според претходните податоци на Државниот завод за статистика, вкупната вредност на извозот на стоки од РС Македонија изнесува 199.881,6 милиони денари. Во споредба со истиот петмесечен период од 2023, статистиката забележала пад од 8,8 отсто.
На другата страна, кај увозот, вредноста на увезената стока се зголемила за 0,9 проценти. И, пресметани се 286.075,7 милиони денари.
Оттаму, минусот на нашата страна, односно трговскиот дефицит е 86.194 милиони денари. За пет месеци, од јануари до мај. Притоа, покриеноста на увозот со извоз изнесува 69,9 проценти.
Статистичките податоци, од аспект на трговската размена по производи, покажуваат дека во извозот се најзастапени катализаторите на носачи со благородни метали или нивни соединенија, сетовите на проводници за палење и слично за возила, авиони или бродови, деловите на седишта од подгрупата 821.1 и други катализатори на носачи.
Во увозот, како што се наведува во соопштението од Статистика, доминираат нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав, платината и легурите на платина, необработени или во прав и електричната енергија.
Интересни се и податоците за увозот на храна. Во првите пет месеци од годинава, во графата кај секторот храна и живи животни е запишано дека Македонија имала извоз од 211.918.000 евра. Увозот е двојно поголем и изнесува 443.760.000 евра.
Подобар е соодносот кај пијалаците и тутунот. Извозот е 83.433.000 евра, а увозот 52.368.000 евра.
Гледано по земји, Германија и натаму е нашиот најголем трговски партнер. Во петте месеци обемот на размената е 1.902.702.000 евра. Македонија на оваа релација е во добра предност – таму извезла стоки во вредност од 1.374.027.000 евра, а увезла за 528.675.000 евра.
Трговскиот однос со Велика Британија бележи вкупна размена од 606.255.000 евра. Кај извозот 41.107.000 евра, а кај увозот 565.147.000 евра.
Следуваат соседите. Трговската размена со Грција е 521.748.000 евра. Од Македонија кон јужниот сосед отишле стоки во вредност од 94.736.000 евра, а во обратната насока за 427.012.000 евра.
Со Србија, пак, вкупниот обем на овој вид соработка е 436.704.000 евра. Таму сме испорачале стоки за 168.750.000 евра, а сме купиле за 267.954.000 евра.
Далечината не е пречка Кина да биде петтиот најзначаен трговски партнер на Македонија. Од јануари до мај се размениле стоки во вредност од 427.775.000 евра. Извозот е 21.928.000 евра, а увозот 405.847.000 евра.
Во соопштението на Државниот завод за статистика се дадени и износите на увозно-извозната активност во евра и во долари.
Изразено во евра, вкупната вредност на извозот на стоки од Република Северна Македонија изнесува 3.246,1 милион и бележи пад од 8,8 % во однос на истиот период од претходната година. Вредноста на увeзената стока е 4.646 милиони евра, што е за 1,0 % повеќе во споредба со истиот период од претходната година. Трговскиот дефицит изнесува 1.399,9 милиони евра, велат од ДЗС.
Пресметано во американската валута, вкупната вредност на извозот е 3.511,9 милиони долари и бележи пад од 8,6 %. Увозот тежи 5.026,4 милиони долари, што е зголемување за 1,1 %. Трговскиот дефицит е 1.514,5 милиони САД долари.
