Аналитика
Трговските односи меѓу САД и Кина добија нова шанса за стабилизација откако двете најголеми економии во светот постигнаа договор за продолжување на примирјето до 10 ноември. Одлуката дојде само неколку часа пред да стапат во сила најавените повисоки царини, кои сега ќе бидат суспендирани уште 90 дена. Заедничкото соопштение на Пекинг и Вашингтон потврди дека разговорите во изминатиот месец биле „конструктивни“, а американскиот претседател Доналд Трамп во понеделник ја потпиша извршната наредба за продолжување на договорот.
Според постигнатиот договор, САД ќе задржат дополнителна царина од 30% на кинескиот увоз, додека Кина ќе продолжи да наплаќа 10% царина за американските производи. Претходно, Вашингтон се закануваше со давачки до 145% за кинески стоки, а Пекинг возврати со најави за царини до 125% на американските пратки. Напнатата ситуација почна да се смирува по рундата трговски разговори во Женева во мај, кога дел од мерките беа ублажени. Белата куќа сега нагласува дека продолженото примирје ќе даде дополнително време за преговори околу трговските нерамнотежи и „нефер трговски практики“.
Американските податоци покажуваат дека трговскиот дефицит со Кина во 2024 година изнесувал речиси 300 милијарди долари, најголем меѓу сите трговски партнери. Дел од разговорите ќе бидат насочени кон олеснување на пристапот на американските извозници до кинескиот пазар, но и кон решавање на прашања поврзани со националната безбедност и економските интереси. Портпаролот на кинеската амбасада во Вашингтон порача дека „двостраната соработка е вистинскиот пат, додека ограничувањата не водат никаде“, повикувајќи на укинување на „неразумните“ трговски ограничувања и зачувување на стабилноста во глобалното производство на полупроводници.
Трговските тензии меѓу двете земји достигнаа врв во април, кога администрацијата на Трамп воведе нови сеопфатни царини за голем број земји, со Кина како една од најпогодените. Пекинг возврати со сопствени тарифи, што доведе до реципрочна ескалација со троцифрени давачки и сериозно нарушена трговија. Во мај дел од тие мерки беа повлечени, но останаа значителни царински оптоварувања.
Во меѓувреме, двете страни продолжуваат да преговараат за теми како пристапот до кинеските ретки метали, набавките на руска нафта и американските ограничувања за продажба на напредна технологија, вклучително и чипови. Трамп неодамна олабави дел од тие ограничувања, дозволувајќи на компании како AMD и Nvidia да продаваат одредени чипови во Кина, во замена за обврска да ѝ префрлат 15% од приходите на американската влада.
САД, исто така, вршат притисок за одвојување на TikTok од неговиот кинески сопственик ByteDance, потег на кој Пекинг се противи. Во пресрет на продолжувањето на примирјето, Трамп изјави дека преговорите „одат добро“ и ја повика Кина да го зголеми увозот на американска соја.
И покрај постигнатиот договор, трговијата меѓу двете земји годинава е значително погодена. Американскиот увоз на кинески стоки во јуни паднал за речиси половина во споредба со истиот месец минатата година, а во првите шест месеци од 2025 година вкупниот увоз од Кина изнесувал 165 милијарди долари, што е за 15% помалку на годишно ниво. Американскиот извоз кон Кина во истиот период опаднал за околу 20%, што укажува дека и покрај паузата во трговската војна, економските последици остануваат значајни.
ДВЕ ТРЕТИНИ ОД КОМПАНИИТЕ ШТО КОТИРААТ НА БЕРЗА СЕ СО ПОМАЛА ДОБИВКА ОД ЛАНИ или се во загуба!?
