Аналитика
Високите температури кои деновиве во делови од земјата надминуваат 40 степени, предизвикаа поизразено губење на почвената влага.
Земјоделството е многу силно изложено на влијанието на климатските промени, пред се поради фактот дека земјоделските активности се изведуваат на отворено и директно зависат од климатските услови.
Топлото време што ја зафати земјава негативно влијае врз земјоделството. Почвата поизразено ја губи влагата, а културите се принудени интензивно да транспирираат. При недостиг на вода во текот на нивниот раст и развој може да дојде до намалување на приносост и квалитетот, предупредуваат агрометеоролозите. Поради тоа, се препорачува максимално активирање на системите за наводнување.
Во овој период приоритет на земјоделците треба да биде наводнувањето, но мора да продолжи и примената на агротехничките мерки.
-Овие временски услови се непогодни за сите култури, освен за некои видови овошки кои се во фаза на берба и зреење на плодовите. Повремените врнежи на некои места во претходниот период не ја подобрија состојбата со влага во почвата, која е потребна за посевите во овој период од годината. Затоа, приоритет на земјоделските производители треба да биде снабдувањето на културите со потребното количество вода – нагласуваат агрометеоролозите од УХМР.
Тие укажуваат дека многу е важно да се посвети поголемо внимание на заштитата од појава на пламеница кај виновата лоза.
Експертите велат дека земјоделците мора да се едуцираат за начинот на производство и да се внимава при третманот на одредени култури, бидејќи ѓубрењето, прскањето против штетници предизвикуваат испуштање метан и азотни гасови кои се некои од најсериозните стакленички гасови. Според тоа, земјоделството е гранка која е силно изложена на влијанието на климатските промени, но и тоа влијае врз нив.
