TE-TO остварил приход од 93 милиони евра во 2020 година, еве како заработил низ годините

Вклучување на гасната централа за производство на електрична и топлинска енергија ТЕ-ТО АД Скопје во надминување на проблемите со енергетската криза во земјава е еден од предлозите на Владата. Притоа Владата предложи цената по која АД ЕСМ може да ја преземе дополнително произведената електрична енергија од природен гас од производителот АД ТЕ-ТО да биде 170 евра/MWh со вкалкулирана продажна цена на природен гас во Македонија за месец јануари 2022.

Сепак од ТЕ-ТО нагласуваат дека продажба на електрична енергија под производната цена означува работење во загуба на Те-То АД Скопје. Производната цена на електричната енергија од Те-То АД Скопје изнесува 251 евра мегават часови без вклучен ДДВ, нагласуваат од гасната централа.

Порталот ,,Пари” ви открива како комбинираната постројка на гас за производство на електрична и топлинска енергија ТЕ-ТО АД Скопје, своевремено претставена како инвестиција клучна за подобрување на енергетската состојба во земјава, работела последните години.

• Во 2020 година ТЕ-ТО остварила приход од 93 милиони евра, а добивката изнесувала повеќе од 12 милиони евра. Оваа година гасната централа остварила пораст на добивката од 298 проценти.
• Претходната 2019 година била нешто послаба за ТЕ-ТО. Кај приходот оваа компанија генерирала 75,8 милиони евра, добивката изнесувала три милиони.
• 2018 е дефинитивно една од најдобрите години за ТЕ-ТО. Во компанијата се слеале 212,4 милиони евра, а реализирала профит од 129 милиони евра. 

Инаку, Владата донесе одлука со која се предлага АД ТЕ-ТО Скопје да работи седум дена во неделата во периодот од 05:00 до 01:00 со полна моќност, а при тоа АД ТЕ-ТО истовремено ќе продолжи да ги реализира своите обврски согласно склучените договори за купопродажба на електрична енергија со потрошувачите на отворениот пазар на електрична енергија, додека АД “Електрани на Македонија” ќе ја откупува електричната енергија произведена од АД ТЕТО Скопје, којашто не е наменета за потрошувачите на АД ТЕ-ТО Скопје, согласно со склучен договор.

Со преземањето на електрична енергија дополнително ќе се обезбеди производство и на топлинска енергија за регулираниот дистрибутер на топлинска енергија со што ќе се овозможи континуирано, квалитетно и економски исплатливо снабдување со толинска енергија на потрошувачите во Град Скопје.

Инсталираниот капацитет на АД ТЕ-ТО изнесува 227 МW.