„СВЕТОТО ТРОЈСТВО” НА ПРИЛЕПСКАТА ИНДУСТРИЈА

Историјата и развојот на најголемите прилепски компании заслужуваат посебно внимание и почит затоа што се градени врз основа на цврсти вредности и во нив е вложен многу труд. Успешниот преод од економскиот модел во поранешната држава до современа пазарна економија, како и создавањето на нови можности за појава на нови компании се двата најбитни сегменти врз кои се темели локалната економија. Дел од овие компании се веќе докажани играчи на меѓународно поле, а исто така новите компании завземаат се поголем дел од глобалните пазари.

Од аспект на постигнатите резултати за 2020 година, согласно податоците на Бизнисмрежа.мк, може да се издиференцираат 3 водечки компании: Витаминка, Прилепска Пиварница и Мермерен Комбинат. Вкупните приходи на овие 3 компании зафаќаат скоро 80% од вкупните приходи на топ 10 сегментот, додека парцијалното учество само на Витаминка изнесува околу 35%. Суверен лидер на пазарот, неколку години уназад, е компанијата Витаминка. И покрај кризната година оваа компанија прокнижила приходи од над 41.6 милиони ЕУР, што претставува пораст од 1.85% во однос на 2019 година. Кај другите две компании од “тројката” забележани се силни нарушувања во продажбата. Имено, Прилепска Пиварница се соочила со пад на приходи од скоро 15%, додека таквите бројки кај Мермерен Комбинат достигнуваат и до 32.8%, што воедно е и најголем регистриран пад во топ 10 сегментот. Од друга страна, со крупни чекори напред се движи компанијата Микросам. Таа е најпозитивниот пример од прилепскиот регион остварувајќи годишен пораст на вкупни приходи од над 75%, а исто така кај оваа компанија регистриран е и најголем пораст на приходи во апсолутна вредност од 4.4 милиони ЕУР.

Износите се изразени во евра | Извор на податоци: БизнисМрежа.Мк

Од аспект на остварените добивки нема правилна корелација со нивото на остварени приходи и по основ на овој параметар бројките се во најмала рака чудни. Имено, Мермерен Комбинат е лидер според остварена добивка, која во 2020 година изнесувала 8.3 милиони ЕУР што претставува 33% од вкупните приходи. Оваа добивка сепак е за 58% пониска од добивката во 2019 година, а кумулативно добивката на останатите 9 компании од ова друштво е скоро 3.5 милиони ЕУР. Умешноста на менаџментот на Мермерен комбинат за вакви бројки е за секоја почит. Прилепска Пиварница заедно со Микросам имаат процентуално најголеми порасти кај остварената добивка, иако апсолутните вредности се на прилично ниско ниво. Она што зачудува е падот на добивка кај Витаминка од 21% и истата во 2020 година изнесувала 223.000 ЕУР, иако видовме дека оваа компанија има приходи од над 40 милиони ЕУР. Најпоразителни бројки во оваа категорија се остварени кај компанијата Крин КГ, која евидентирала пад на добивка од 72%, додека компанијата Инјецтион Моулдинг втора година по ред е во загуба.

Износите се изразени во евра | Извор на податоци: БизнисМрежа.Мк

Од аспект на примањата на вработените во овие 10 компании може да се забележи дека сепак пелагониската пресметка е на страната на битолските компании(анализирани во предходната колумна), кои далеку повеќе го вреднуваат трудот на вработените. Интересно кај прилепските компании е тоа што највисоката просечна плата ја исплаќа компанијата Кривогаштани – Промет со 41.691 денари, меѓутоа од вкупно 36 вработени. За разлика од неа, компаниите каде има масовни вработувања значително “го врзале ќесето”. Убедливо најголем работодавец е Витаминка каде на платниот список се наоѓаат 681 вработен, а во втор план се Мермерен Комбинат и Прилепска Пиварница со над 250 вработени. Тенденцијата за пораст на Микросам се гледа и преку бројот на вработени кој во 2020 година се зголемил за 22%, што претставува најголем пораст кај топ 10 компаниите. Од друга страна, кај двете компании кои имаа потешкотии со генерирање добивка има и значителен пад на бројот на вработени од над 15%.

Редакција Пари