Сушата на американскиот Запад најлоша во последните 1.200 години

Ужасната суша што го зафати американскиот Запад ги создаде најсушните две децении во регионот во последните 1.200 години, а климатските промени предизвикани од човекот го поттикнаа проблемот, велат научниците. Во истражувањето, објавено во списанието Nature Climate Change, научниците ги анализирале сушите во југозападна Северна Америка кои датираат од 800 година и откриле дека условите во овој век се потешки од мега-сушата во доцните 1500-ти, јавува Си-Ен-Би-Си.

Истражувачите предупредија дека условите најверојатно ќе продолжат и во 2022 година и ќе траат со години. Според Националната океанска и атмосферска администрација на САД, мега-суша е дефинирана како продолжена и тешка суша која опфаќа две децении или подолго.

„Наместо да почне да се намалува по влажните години во 2017 и 2019 година, сушата од 2000-тите се зголеми во 2020-2021 година, со што стана јасно дека и сега е силна“, изјавил Парк Вилијамс, климатски научник од Универзитетот во Калифорнија UCLA.

„Нема докази дека сушата од 2000-тите почнува да попушта“, додаде Вилијамс, кој ја водеше анализата користејќи податоци од прстените на дрвјата.

Иако истражувачите велат дека Западот на САД ќе страдаше од суша и без климатските промени, тие пресметаа дека 42% од нејзината сериозност може да се припише на повисоки температури поради причини поврзани со човекот, наведувајќи ги емисиите на стакленички гасови кои ја задржуваат топлината во атмосферата.

Според американскиот Монитор за суша, скоро 95% од регионот се соочува со услови на суша, а заедно со тоа, поинтензивни шумски пожари и намалени резерви на вода во регионот на реката Колорадо. Нивото на водата во двете најголеми акумулации во земјата, езерото Мид и езерото Пауел, се на најниските нивоа досега забележани. И во 2020 година, најлошата сезона на шумски пожари изгореа повеќе од 10 милиони хектари во САД.

Федералните власти минатата година наредија први прекини на водата за сливот на реката Колорадо, што влијаеше на снабдувањето со вода и електрична енергија за повеќе од 40 милиони луѓе ширум Западот.

Во Калифорнија, гувернерот Гевин Њусом побара од жителите минатата година да ја ограничат потрошувачката на вода во домаќинствата за 15% во услови на рекордни температури. Властите неодамна предупредија дека Калифорнија би можела да се соочи со третата последователна сушна година поради значителниот недостаток на снег оваа сезона.