Аналитика
Банката со најдолга традиција во Македонија добро се справува со кризите и е лесно прилагодлива на современите банкарски текови и на барањата на клиентите. Стабилноста, понудата и воспоставената комуникација и соработка со бројните корисници на услугите, очигледно, даваат резултати. Стопанска банка од работењето во изминатите три квартали се издвојува од конкуренцијата по приходите остварени од пресметаните и наплатени камати, во износ од 67,8 милиони евра.
Па, кога од основната банкарска активност има толкави приливи, јасно е дека и добивката е солидна. Профитот од деветте одработени месеци е во нето-износ од 40,28 милиони евра. Од Банката посочуваат дека во најголем дел тоа се должи на повисоки приходи од севкупната дејност, но се издвојува зголеменото кредитно портфолио.
Инаку, нето-приходите од камати, во споредба со истиот лански период се поголеми за 18,2 милиони евра. Причина за ова движење, освен растот на каматните стапки, кои одат во прилог на сите банки, се и зголемените кредитни активности.
Петпроцентен пад има кај приходите од провизии и надоместоци. Од наплатата за извршените услуги во Стопанска се инкасирани речиси 10,3 милиони евра. Намалување има и кај нето-приходите од курсни разлики – за осум отсто, па тие се во износ од 1,8 милиони евра. Останатите, пак, приходи од дејноста се нешто над шест милиони евра.
Кредитите и побарувањата од други комитенти се во нето-износ од 1,45 милиони евра и имаат раст од четири проценти. Додека кредитите и побарувањата од банки се близу 5,5 милиони евра откако забележале зголемување од 14 насто.
Што се однесува до вкупните депозити, во Стопанска банка се евидентирани 1,55 милијарди евра.
Од Банката се задоволни што и покрај ценовните движења и инфлацијата успеале да ги држат под контрола оперативните трошоци, кои се на ниво од 11,7 милиони евра.
Стопанска банка располага со капитал и резерви од речиси 403 милиони евра, кај кои зголемувањето е за 12 насто во однос на крајот од минатата година. А, нејзината вкупната актива е 2,04 милијарди евра.
Од Стопанска банка посочуваат дека одат понатаму, целосно ориентирани кон клиентите и задржувањето на значајниот удел што го има на домашниот банкарски простор.
новинар:
Маја Анастасова
