Аналитика
Само каматите во првата половина од годинава обезбедиле чист приход од близу 43 милиони евра, износ за повеќе од 10 милиони евра поголем во однос на остварениот во истиот период лани
Скопската Стопанска банка e сериозен играч на македонскиот банкарски простор. Со стекнатата доверба од клиентите, низ годините исцртува непрекината успешна деловна линија, на која се бележат бројки и проценти со предзнак плус.
Последните во низата упатуваат на тоа дека за шест месеци Банката ја зголемила добивката за 15 проценти. И „набилдала“ 38 милиони евра, изразено со банкарскиот речник – добивка пред оданочување и резервации. Во денари – 2.323.241.000. Паралелно со тоа, како одговор на ризиците домашни и надорешни, издвоена е посебна резерва за вонбилансна изложеност од 10,7 милиони евра, со што добивката пред оданочување е 27,2 милиони евра.
Кредитирањето е силна страна на Стопанска банка и основа за големи приливи. Само од пресметаните и наплатени камати, во првата половина од годинава остварен е чист приход од близу 43 милиони евра (2.621.190.000 денари). Износот е за 10,3 милиони евра поголем во однос на споредбениот минатогодишен период.
За да биде појасно, Стопанска банка одобрила кредити во висина од 1,4 милијарди евра. Износ кој е за три проценти над запишанот на последниот ден од 2022 година. Воедно, треба да се спомене и нејзината лидерска позиција со пазарно учество од околу 27 проценти во сегментот на кредитирање на населението. Освен тоа, се зголемува и пазарниот удел во делот на кредитирање на компаниите, кој на крајот од јуни достигна 16,3 проценти.
Состојбата со каматите е толку добра, што не дозволува во крајниот резултат забележливо да се одразат „минусите“ од пет и од седум проценти регистрирани кај провизиите и надоместоците и кај курсните разлики. Во шестте месеци од 2023 прокнижени се приходи во нето износи од нешто над седум милиони евра – провизии и надоместоци, односно 1,3 милиони евра – од курсни разлики.
Банката има и други приходи од дејноста, од кои прокнижила 3,7 милиони евра.
Во контекст, пак, на споменатата доверба од клиентите, треба да се нагласи и податокот дека на Стопанска банка во форма на депозити и се доверени 96.768.046.000 денари или 1,6 милијарди евра.
Воедно, Банката е и добар работодавач. Грижата за тимот се согледува во износот од 8,2 милиони евра, кои од јануари до јуни се исплатени како плати и се забележани под ставката трошоци за вработените.
Поради тоа што банкарските активности се ефектуираат со приходи кои се движат по нагорна линија, капиталот и резервите на Банката се 388 милиони евра. Зголемени се за седум насто. Сето тоа придонело и за раст на активата, која на 30 јуни дошла до прагот од речиси 2,1 милијарда евра.
M.A.
