Сите заедно тежат над 9 милијарди евра. Кои се најбогатите македонски банки за 2020?

Очекувано без некое поголемо изненадување во банкарскиот сектор и покрај предизвиците од здравствената криза минатата година високо на врвот остануваат да котираат три банки. Убедливо на првата позиција е закотвена Комерцијална банка, малку со заостанување, но сепак чекор со неа фаќаат и втората најголема банка според актива во земјава Стопанска банка и на третото место е НЛБ банка.

Според податоците на Народната банка активата на Комерцијална банка лани пораснала на 2,157 милијарди евра. Во однос, пак на претходната 2019 година активата се зголемила за 156 милиони евра.

Активата на Стопанска банка Скопје на крајот на минатата година изнесувала 1,724 милијарди евра или 103 милиони повеќе во однос на 2019-та.

Третата најголема банка во земјава НЛБ банка исто така успеала да ја зголеми активата. Податоците покажуваат дека лани активата на оваа банка изнесувала 1,4 милијарди евра и е зголемена за 137 милиони евра во однос на претходната година.

Од трите банки Стопанска банка има остварено највисока бруто добивка од 2.177.457 илјади денари, потоа следи Комерцијална со 1,986.753 илјади денари и НЛБ со бруто добивка од 1.857.334 илјади денари. Високата добивка на Стопанска банка доаѓа од остварените приходи од камата во бруто износ од 4.136.546 илјади денари. Нето приходите од камата, пак кај НЛБ Банка се 2,913.186 илјади денари, а кај Kомерцијална изнесуваат 2.419.344 илјади денари.

Депозитите им се најголем извор на средства на трите банки.Во Комерцијална банка учествуваат со 87% во пасивата, во НЛБ со 82% и во Стопанска со 81%. Од депозитите Стопанска банка околу 82% ги пласира во кредити, НЛБ 73 проценти, а Комерцијална околу 44 проценти.

Од останатите банки податоците покажуваат дека значајно напредува Халк банка. Активата на Халк Банка веќе достигнала 1,089 милијарди евра или за една година пораснала за  156 милиони евра.

Охридска банка, е следна на листата и петта по големина. Нејзината актива лани била 738 милиони евра, што е за 49 милиони евра повеќе од претходната 2019 година.

Прокредит банка, исто така средна банка, со актива од 574 милиони евра, е на шесто место според големината.

Шпаркасе банка има актива од 429 милиони евра и е на седма позиција. Осма е УНИ Банка, со актива од 386 милиони евра, што е раст од 17 милиони евра во однос на една година претходно. Развојната банка на Северна Македонија има актива од 195 милиони евра и е деветта, Стопанска банка Битола со 179 милиони евра е на десетто место, а последната средна банка е Централно-кооперативна банка, со актива од 172 милиони евра.

Во групата на мали банки прва е ТТК банка, со актива од 114 милиони евра, по неа е Силк Роуд банка со актива од 113 милиони евра, и најмалата Капитал банка, чија актива изнесува 44,5 милиони евра.

Прочитај и: Г-ДИН ХАРИ КОСТОВ ВЛЕВА НОВ ОПТИМИЗАМ КАЈ АКЦИОНЕРИТЕ НА КОМЕРЦИЈАЛНА БАНКА?!