Аналитика
Раздвижено е на пазарите низ Скопје. Вообичаено за оваа сезона, тезгите се шаренеат од плодови. По зимскиот период со ограничена понуда, посебно е интересно овошјето. Освен што е присутно увезеното од Турција и Грција, веќе го има и од домашното производство. А, обиколката уште еднаш потврди, најскапо е во Буњаковец, а најпристапни се цените на Зелениот пазар во центарот на градот.
Па, еве каква е состојбата со цените:
Јагодите, за кои пазарџиите велат дека ова им се последни денови, се уште држат цена на пазарот лоциран во скопски Буњаковец. Таму за килограм треба да се платат од 200 до 300 денари. Нешто се поевтини на пазарчето во Тафталиџе, каде што се продаваат по цена од 100 до 140 денари. Најевтини се на Зелениот пазар, каде што се продаваат за 50 до 70 денари.
Црешите се од 150 до 200 денари за килограм на Буњаковец. За 100, 140, 150 и 200 денари може да се купат во Тафталиџе. Од 100 до 150 денари на пазарот во Ѓорче Петров, а на Зелениот пазар се во распон од 60 до 180 денари.
Килограм кајсии на пазарот во Буњаковец се продаваат за 200 денари. На пазарите во Тафталиџе и Ѓорче Петров се од 100 до 150 денари, а на Зелен пазар 80 денари.
Праските, овие првите, чија семка се уште не се двои од плодот, на пазарот во Ѓорче Петров се со цена од 60 до 80 денари за килограм, а на Зелениот пазар од 40 до 80 денари. Во Ѓорче веќе ги има и нектарините, или таканаречените „голи“ праски кои се продаваат меѓу 50 и 80 денари за килограм.
За едно канче со малини во Буњаковец треба да се платат 200 денари. Од 120 до 150 денари истото пакување чини на пазарчето во Тафталиџе, а во Ѓорче Петров – стотка.
Рибизлите, исто така во канче, на пазарот во Буњаковец се од 150 до 200 денари, од 100 до 120 во Тафталиџе, а од 80 до 100 денари во Ѓорче Петров.
Засега боровинки има само во Буњаковец. Цената е илјада денари за килограм.
Полека почнуваат да се појавуваат дињите и лубениците. На пазарите во Буњаковец и Тафталиџе килограм диња е 200 денари, а двојно е поевтино во Ѓорче – 100 денари. Килограм лубеница е од 50 до 60 денари на пазарчето Тафталиџе, а во Ѓорче Петров од 48 до 60 денари.
Бананите кои до неодамна беа дел од владините мерки, сега се со пазарно регулирани цени. Килограм е од 70 до 90 денари во Тафталиџе, 80 денари на пазарот во Буњаковец, во Ѓорче Петров од 70 до 80, додека за 65 до 70 денари можат да се купат на Зелениот пазар.
Разликите во цените по пазарите не се должат на квалитетот, туку на понудата и побарувачката, како и на џебот на муштериите. Продавачите кои со години се во секојдневна комуникација со купувачите, процениле – во Буњаковец доаѓаат оние кои сакаат „господски“ да пазарат; во Карпош има многу пензионери кои не можат или не сакаат да одат подалеку од ним блиското пазарче Тафталиџе, но и многу странци кои не прашуваат за цена; на Зелениот пазар се оди на масовна продажба, муштерии има од сите делови на градот, па затоа и е поевтино.
Маја Анастасова
