Аналитика
За прв пат хакерска група донираше украдени пари во добротворни цели, што ги збунува експертите од областа на компјутерскиот криминал, но и оние за кои се наменети парите.
Хакери од група која се нарекува „Дарксајд“ тврдат дека досега изнудиле милиони долари од компаниите, но дека сега сакаат „да го направат светот подобро место“.
Хакерската група објави копии од сметки од 10.000 американски долари во биткоини за две добротворни организации.
Една од нив, Children International, рече дека нема да ги задржи парите.
Потегот се перцепира како невообичаен и како загрижувачки развој на случувањата, како морално така и законски.
Во објава на својот блог на 13 октомври, хакери тврдат дека нападите се насочени само кон големи профитабилни компании.
Станува збор за уценувачки напади со употреба на софтвер. Хакерите ги напаѓаат ИТ системите на една компанија и ги држат блокирани сè додека таа компанија не ги плати бараните пари.
„Сметаме дека е праведно дел од парите што компаниите ги платија да одат за добротворни цели“, се вели во пораката на хакерот.
„Без оглед на тоа што мислите дека она што го правиме е лошо, ние сме среќни кога знаеме дека сме помогнале на нечиј живот. Првите донации ги испративме денес “.
Сајбер криминалците ја објавија донацијата заедно со даночни сметки што ги добиле во замена за 0,88 биткоини што ги испратиле на две добротворни организации – The Water Project и Children International.
Children International им помага на децата, семејствата и заедниците во Индија, Филипини, Колумбија, Еквадор, Замбија, Доминиканска Република, Гватемала, Хондурас, Мексико и САД.
Портпарол на организацијата за БиБиСи изјави: „Ако донацијата е поврзана со хакери, немаме намера да ја задржиме“.
Од организацијата The Water Project, која работи на подобрување на пристапот до чиста вода во субсахарска Африка, не одговори на барањето да даде коментар за случајот.
Брет Келоу, аналитичар за сајбер безбедност во „Emisoft“, рече дека „воопшто не му е јасно на што се надеваат криминалците со овие донации“.
„Можеби тоа помага во ублажување на нивната вина? Или можеби од себични причини, тие сакаат луѓето да ги гледаат како некој вид на Робин Худ, а не изнудувачи “.
„Без оглед на нивниот мотив, тоа е секако многу необичен чекор и, колку што знам, ова е првпат група како оваа да донира дел од профитот во добротворни цели“.
Хакерската група Дарксајд е релативно нова на сцената, но анализата на пазарот на криптовалути потврдува дека таа многу активно изнудува средства од компаниите, односно жртвите.
Исто така, постојат докази дека тие се поврзани со други групи за компјутерски криминал одговорни за напади врз компании, вклучувајќи го и Травелекс, кој беше жртва во јануари.
Една можна причина за дополнителна загриженост е начинот на кој хакерите плаќале донации на хуманитарни организации.
Сајбер криминалците ги платиле средствата преку американската служба наречена „The Giving Block “, која ја користат 67 различни непрофитни организации од целиот свет, вклучувајќи ги „Save the Children“, „RainforestFoundation“ и „The Giving Block “.
Giving Block наведува дека „тоа е единственото непрофитно решение за прифаќање донации во крипто-валути“.
Компанијата е основана во 2018 година за да им понуди на „милионерите“ на криптовалути можност да користат „огромен даночен поттик да донираат биткоин и други криптовалути директно на непрофитни организации“.
Од организацијата за Би-Би-Си велат дека не знаеле дека овие донации доаѓаат од сајбер-криминалци.
„Ние сè уште работиме на утврдување на фактите дали тие средства навистина биле украдени.
„Доколку се покаже дека овие донации дошле од украдени средства, секако дека ќе го започнеме процесот за враќање на нив на вистинскиот сопственик.
Компанијата не појасни дали тоа значи враќање на украдените пари на криминалците или обид да се утврди која од жртвите на компјутерски криминал има намера да ги врати средствата и како.
Од The Giving Block огранизацијата, која се залага за крипто-валути, додава: „Фактот што користеле крипто ќе го олесни нивното наоѓање“.
Сепак, тие не дадоа детали за тоа какви информации собираат за нивните донатори.
Повеќето услуги што вклучуваат купување или продавање дигитални монети како што е биткоинот, од корисниците бараат да го потврдат нивниот идентитет, но не е јасно дали тоа е направено во овој случај.
БиБиСи се обиде да донира анонимно преку мрежниот систем The Giving Block к и не му беа поставени никакви прашања во врска со проверка на идентитетот.
Експертите велат дека случајот укажува на комплексноста и опасноста од анонимни донации.
Истражувачот на криптовалутата, Филип Градвел од Chainanalysis, рече: „Ако влеговте во добротворна продавница со маска од Анонимус и дониравте 10.000 фунти во готово, а потоа побаравте сметка, веројатно треба да бидат поставени прашања.
„Точно е да се каже дека истражувачите и надлежните органи станаа вешти во наоѓање и следење на криптовалути додека одат од паричник во паричник. Но, да дознаете кој всушност го поседува секој паричник е многу покомплицирано.
„Дозволувајќи анонимни донации од потенцијално незаконски извори, е можност за перење пари“, рече тој, додавајќи дека „на сите компании за крипто-валути им треба цела низа мерки за да спречат перење пари“.
Новинарите на Би-Би-Си разговараа со други добротворни организации кои прифаќаат донации преку проектот „Давање“.
Од „ Save the Children “ за Би-Би-Си изјавија дека „тие никогаш нема намерно да ги земат парите стекнати од криминал“.
Од „ She’s the First“, добротворна организација за образование на девојчиња ширум светот, рекоа дека не би било пријатно да се добиваат пари од анонимни и евентуално криминални извори.
