Аналитика
Цените во хотелите и рестораните во Србија бележат значителен пораст – во мај биле повисоки за 10 проценти во однос на истиот месец минатата година, објави Републичкиот завод за статистика (РЗС). Главниот двигател на ова зголемување е храната, чии цени се зголемени за 11,4 проценти, што значи дека оброкот во ресторан или кафуле сега чини значително повеќе отколку пред една година.
Поскапувањето најмногу се чувствува кај основните сегменти на понудата. Салатите и лебот бележат најголем скок – 14,2, односно 14,0 проценти. Но ниту останатите категории не се изземени од инфлаторниот притисок: готовите оброци се поскапени за 11,3 проценти, оброците по нарачка и печивата за 11 проценти, а и предјадењата (топли и ладни) не заостануваат со раст од 10 проценти.
Паралелно со храната, раст бележат и пијалоците. Алкохолните се зголемени за 12,9 проценти, а безалкохолните за 13,4 проценти. Единствен сегмент што останува речиси непроменет е сместувањето – тука е регистрирано минимално зголемување од само 0,3 проценти.
Овие податоци се дел од поширокиот тренд на зголемени трошоци за живот во Србија. Вкупната инфлација во земјата во мај изнесува 4,5 проценти на годишно ниво, но токму угостителските услуги се издвојуваат како сектор со значително повисока стапка на раст. Овој дисбаланс покажува дека покачувањето на цените најсилно се чувствува токму во секојдневното искуство на граѓаните – при излегување, патување или прослава.
Пазарот реагира на повисоки трошоци за набавки, енергија и плати, но за Србите тоа значи едно – се поскапа сметка секојпат кога ќе седнат на маса.
