Првата пловечка соларна централа во Албанија започнува со производство

Statkraft, најголемиот европски генератор на обновлива енергија, во соработка со норвешкиот снабдувач Ocean Sun, започна комерцијални операции во првата единица на својот пловечки соларен проект во Албанија, што дополнително придонесува за зголемување на обновливата енергија во земја.

Проектот е поставен во резервоарот Бања во Албанија, каде „Статкрафт“ работи со својата хидроцентрала Бања од 72 мегавати. По успешното завршување на првата пловечка соларна единица и мрежно поврзување, централата сега произведува обновлива енергија и вбризгува енергија во албанската национална мрежа.

Пловечката соларна енергија вклучува инсталирање на соларни панели на пловечки конструкции на водено тело, како што е езеро, фјорд или океан или во хидроцентрала. Секоја единица се состои од пловечки прстен и тенка мембрана. Во комбинација со подводно ладење на панелите, токму оваа мембрана и големата површина го прават овој концепт уникатен. Технологијата е развиена од Ocean Sun, и иако мембраната има дебелина од само неколку милиметри, таа лесно може да ја издржи тежината на соларните панели и персоналот кои извршуваат задачи за инсталација или одржување.

Првата единица, која се состои од 1.536 соларни панели, има инсталиран капацитет од 0,5 MWp и опфаќа скоро 4.000 квадратни метри. Покрај тоа, 160 идентични плочи беа поставени на земјата за да се спореди и документира ефектот на ладење на пловечките плочи.

Втората фаза од проектот се очекува да продолжи во текот на втората половина на 2021 година, со инсталирање на дополнителни три лебдечки единици, со комбиниран дополнителен капацитет од 1,5 MWp.