Аналитика
Уште една вест во низата со иста содржина – „Настел“ продаде акции на „Реплек“. Третата информација од 15 јули наваму вели дека фирмата на Зоран Азманов продала дополнителни 1.179 акции издадени од фармацевтската компанија. Сега во сопственост има 22.409 акции.
Еве ја објавата од „Реплек“ пласирана на Македонска берза:
„Согласно Глава 6 од Правилата за котација, известуваме за следната ценовно чувствителна информација:
Постапувајќи согласно член 38 од Правилата за котација на Македонска берза АД Скопје, Реплек АД Скопје објавува
Акционер со над 5% односно компанијата Настел ДООЕЛ продаде 1.179 акции, со што поседува вкупно 22.409 или 8,65% од вкупниот број на акции“.
Пред оваа продажба уделот на „Настел“ во сопственичката структура беше 9,1, а претходно 9,36 проценти…
Истиот текст, само со различни бројки и проценти, на инвеститорската јавност и беше упатен на 15 месецов, потоа на 18, па на 23 јули.
Првиот пат се работеше за тоа дека акционерот со над 5% продал пет акции, со појаснување дека тоа е направено пред поделбата на акциите. А, по поделбата „поседува вкупно 24.270 или 9,36% од вкупниот број на акции“. Според берзанските податоци, на 11 јули е извршена купопродажба на пет акции на „Реплек“ по единечна цена од 125.000,8 денари.
Инаку, поделбата се изврши на 15 јули, кога од една акција произлегоа десет, а цената која одеше над сто илјади денари, на тој датум, по ново, изнесуваше 13.651,66 денари.
Три дена подоцна, во наредното известување пишуваше дека „Настел“ ја намалил сопственоста на 9,10 проценти, откако продал 682, а поседува 23.588 од вкупниот број акции на „Реплек“. Ако е трансакцијата извршена на 18 јули, тогаш најверојатно акциите се продадени по цена од 15.893,77 денари. Помеѓу, во двата дена, се тргувало со акциите на „Реплек“, а просечната цена била 14.499,59, односно 14.862,45 денари.
Всушност, речиси и нема ден кога не се тгува со акциите на фармацевтската компанија. На дневната листа од 23 јули е забележано дека се истргувани 75 акции, а просечната цена е 17.386,69 денари.
Веројатно, јавноста се прашува дали „Настел“ сосема ќе излезе од „Реплек“, иако тоа би било спротивно на неговите најави од пред неколку години, дека е заинтерсиран за фармацијата како бизнис.
