Аналитика
Акциите, 2.454 на број, издадени од 11 компании и од две банки, се евидентирани во минатонеделните нетрговски трансфери. Сите акции се обични, а најмногу од нив – 1.026, се трансферирани во средата.
Во седмичната статистика на Централниот депозитар за хартии од вредност, чии податоци ги објавува Македонска берза, е заведено дека во два наврати се пренесувала сопственоста на акциите од Комерцијална банка и од „Алкалоид“.
Станува збор за 81 акција на Комерцијална банка. Во вторникот низ овој процес минале 47, а во петокот 34 обични акции.
Во средата нетрговскиот трансфер забележал 117 обични акции, а ден потоа уште 300 обични акции. Или, вкупно 417 акции на „Алкалоид“ се наследени, подарени или сопственоста е променета заради друга законски дозволена причина.
Минатата работна недела во овој домен почнала со 298 обични акции на ТТК банка.
Според количината, нема поголемо издвојување. Најбројни се акциите на „Жито Лукс“ АД Скопје – 460.
Трицифрени бројки се запишани и кај преносите на акции од „Попова Кула“ АД Демир Капија – 350, РЖ „Услуги“ – 340 и „Макстил“ – 289 обични акции.
Останатите се под сто. Во нетрговските трансфери има 64 акции на „Окта“ и 44 на „Уготур“ АД Скопје.
Исто така, и минатата недела се пренесувале акциите од фирмите прозлезени од некогашната скопска „Железара“; 42 обични акции на РЖ „Интер-Трансшпед“, 40 на РЖ „Економика“ и 16 на РЖ „Техничка контрола“.
Во оваа статистика најмалку акции – 13, се подарени од „Македонијатурист“ АД Скопје.
