Аналитика
Да се фатиме за работа, доста беше зборење – рече премиерот Димитар Ковачевски на свеченоста со која се одбележа поставувањето камен темелник на автопатската делница Прилеп-Битола на Коридорот 10д, кој треба да е со должина од 40 километри и со шест ленти.
Тоа значи поврзување на истокот и западот на државата. Нови бизниси, нови осум илјади работни места. Развој на населените места. Значи и нови даночни обврзици и повеќе пари во државната каса, посочи премиерот, нагласувајќи дека на тој начин граѓаните ќе добијат подобро образование, здравсто и услуги, подобра патна, железничка, енергетска инфраструктура. Како што истакна, парите на граѓаните се вложуваат во нивната иднина.
„Подготвени сме веднаш по свеченоста со механизацијата да почнеме да работиме се до завршувањето на проектот“, нагласи Благој Бочварски, министерот за транспорт и врски и додаде дека сега не зборуваат за програмски ветувања, туку за старт на капитален проект, особено за Пелагонискиот регион кој мора да се развива. Изградбата значи регионално поврзување, подобар живот за граѓаните, развој на стопанството. Воедно, ги повика стопанствениците од регионот да инвестираат, а државата ќе им помогне да бидат уште поуспешни.
Американско-турскиот конзорциум изгради убави автопатишта низ Балканот. Сега ќе ги има и во Македонија, срцето на Балканот, рече турскиот амбасадор Хасан Мехмет Секизќок, кој за компанијата „Енка“ нагласи дека е гордост на Турција.
Прилеп и Битола се поврзуваат со современ и безбеден автопат. Тоа е од суштинско значење за економскиот развој не само за луѓето и трговијата, туку и ќе привлекува инвестиции, сметапретставникот на американската амбасада Ерик Мајер. Тој посочи на повеќекратните придобивки од изградбата на автопатиштата – цврсти врски меѓу соседите, корист за ангажираните во изведбата, подобра конкурентност на прватниот сектор… „Наскоро ќе го посетиме ова место и ќе видиме како се одвиваат работите, но порадосен ќе бидам кога автомобили и камиони ќе го користат автопатот“, рече тој.
Џастин Сиберел, претседател на „Бехтел и Енка“ за Европа, Африка и Блискиот Исток и се заблагодари на Владата за добиената доверба. Притоа, нагласи дека со изградбата на коридорите државата ќе добие подобрени транспортни комуникации и поголема економска корист.
Работите тргнаа.
Камен-темелник прв пат. Свеченост со фотографирање и говори – втор пат. На почетокот од минатиот месец на автопатот Тетово – Гостивар исто така имаше свеченост, но тогаш во чест на изградбата на трите автопатски делници на Коридорот 8. Беше откриена табла, а градежните работи изостанаа.
Изостанаа и конкретни одговори на низа прашања. Затоа и понатаму интригира тоа – зошто даночните обврзници немаат право да знаат за што се трошат нивните пари. А активностите се одвиваат, па и потребните законски измени Владата ги пренасочи на експресната лента ставајќи им европско знаменце, иако немаат врска со реформите и усогласувањето со европското законодавство – потврдија претставници на ЕУ.
Освен тоа, преку Јавното претпријатие за државни патишта како инвеститор, префрлени се 117 милиони евра за подготвителните активности. Годинава се издвоени 243 милиони евра во програмата за финансирање на делниците. За експропријација ќе бидат неопходни плус 300 милиони евра.
Поради сомневањата за можна корупција антикорупционерите и Обвинителството отворија предмети. Но, работите го добиваат својот тек, иако и натаму се е под превезот на доверливоста, на која инсистираат властите во име на стратешкото партнерство – цена, експропријација, пенали, рокови, работни часови…
