ПОВЕЌЕ

    По успешните делови резултати НЛБ банка ќе исплати дивиденда од 36,6 милиони евра

    Време зa читање: 4 минути

    Уште една успешна година со обезбедена силна кредитна поддршка за бизнисот и населението, со одржливо и одговорно делување, и со раст во сите сегменти од работењето и остварена нето-добивка од 52,3 милиони евра – резултатите од работењето на НЛБ банка беа презентирани на годишното акционерско Собрание. Усвоена е и одлука за определување износ на дивиденда за 2023 година во висина од 36,6 милиони евра.

    „Во 2023 година, и покрај бројните предизвици, инфлаторни и ценовни, нарушени синџири на снабдување, воени конфликти и намалени инвестиции во бизнисот, прилагодувајќи ги оперативните активности и ценовната политика на економските и пазарните услови, согласно промените во законските одредби и деловната стратегија на Групацијата, НЛБ Банка оствари позитивни деловни резултати во сите сегменти од работењето, а годината ја заврши со нето-добивка од 52,3 милиони евра што преставува годишен пораст од 32,2%“, истакна во обраќањето до акционерите претседателот на Управниот одбор на НЛБ банка, Бранко Грегановиќ.

    Вкупната актива на Банката достигна 1,9 милијарди евра што е за 3,3% повеќе во однос на претходната година, при раст на кредитната активност од 4,3%, што се должи на раст на кредитите кај домаќинствата во однос на претходната година. Во сегментот правни лица, Банката обезбеди значајна поддршка на проекти за унапредување на животната средина, инвестициони активности во областа на ЕСГ проекти со кои се овозможува зелена транзиција на клиентите, и во финансирање на бизнисот во севкупен износ од 273 милиони евра нови пласмани, додека уделот на нефункционалните пласмани се наоѓа на ниско ниво од 3,6% од вкупното кредитно портфолио. И вкупните депозити забележаа годишен раст од 2,6%.

    НЛБ банка ја заврши 2023 година со повисоки показатели за солвентност и капитализираност, во споредба со претходна година и го одржа високото пазарно учество и трендот на раст, што е уште еден показател за успешноста на Банката во поглед на обезбедувањето на континуитетот во работните процеси во услови на глобална економска неизвесност.

    Како една од стратешките определби Банката овозможи нови функционалности и подобрено корисничко искуство за клиентите преку дигитализација на картичките и плаќање преку Google Pay и воведувањето на Smart POS – мобилна апликација наменета за претприемачите за прифаќање на платежни трансакции засновани на платежна картичка, безконтактно на мобилни уреди.

    Покрај одличните резултати, изминатата година ја одбележаа и низа општествени проекти на Банката со значаен импакт во заедницата во која делува, за што говорат бројните признанија и награди.

    Во 2023 пазарната цена на акцијата на НЛБ банка забележа годишен раст од 25% и е во топ три најтргувани хартии од вредност на официјалниот пазар на Македонската берза. Притоа, НЛБ банка е лидер меѓу котираните друштва од МБИ 10 индексот, со остварен дивиденден принос за 2023 година од 8,2%.

    На Собранието беше усвоена и одлука за определување износ на дивиденда и утврдување на дивиденден календар. На акционерите ќе им биде исплатена дивиденда за 2023 година во бруто-износ од 2.251.304.796 денари или околу 36,6 милиони евра. Износот на бруто дивиденда по акција изнесува 2.636 денари.

    „Водена од своите вредности, НЛБ банка ќе продолжи со унапредување на капацитетите, со посебен акцент на дигитализацијата и вештачката интелигенција, проширување на палетата на производи и услуги преку продажба на различни банкарски и небанкарски продукти, подобрување на корисничкото искуство и зголемување на задоволството на клиентите, со фокус на зелените и општествено одговорни проекти. Како системски значајна банка, НЛБ банка и понатаму ќе делува во насока на подобрување на квалитетот на животот во заедницата, придонесувајќи кон одржлив економски, еколошки и социјален развој“, нагласи Грегановиќ.

     

    14,794Следи нè на facebookЛајк

    слично