Илон Маск веќе не е најбогата личност во светот

Илон Маск, ја изгуби позицијата најбогата личност на светот според Форбс, откако акциите на неговата компанија Тесла паднаа близу 8 проценти.

По краткиот престој на врвот на листата на најбогати, милијардерот на Тесла повторно е втора најбогата личност во светот откако неговото богатство падна за скоро 14 милијарди долари за еден ден.

Акциите на производителот на електрични возила Тесла во понеделникот паднаа за скоро 8%, со што нето-вредноста на Маск се намали за 13,5 милијарди долари на 176,2 милијарди долари. Така, откако минатиот петок накратко го престигна извршниот директор на Амазон, Џеф Безос, како најбогата личност во светот, според проценката на Форбс, Маск повторно падна на второто место.

Сега заостанува околу 6 милијарди долари зад Безос, чија нето вредност е 182,1 милијарди долари. Акциите на Амазон во понеделникот паднаа за над 2%, што исто така ја намали нето-вредноста на Безос за 3,6 милијарди долари.

Водено од скок на цените на акциите на Тесла, богатството на Маск се зголеми за околу 150 милијарди долари од март 2020 година, кога изнесуваше 24,6 милијарди долари.

Акциите на Тесла се зголемија за над 720% во 2020 година и веќе добија дополнителни 12% во првата недела од 2021 година. Тесла се приклучи на индексот С & П 500 кон крајот на декември 2020 година, потег што исто така ги зголеми акциите.

Највредниот светски производител на автомобили Тесла произведе половина милион автомобили во 2020 година – дел од производството во глобалните гиганти како ГМ и Тојота.

И покрај падот на богатството во понеделникот, Маск е сè уште околу 20 милијарди долари побогат од третиот најбогат човек во светот, францускиот тајкун во секторот луксузни стоки Бернард Арно (вреден 154,6 милијарди долари денес).