Отворање сметка во Халкбанк отсега на било кој шалтер на Пошта

Сите корисници на поштенски услуги, отсега, во било која од 324-те активни поштенски единици на Македонска Пошта АД, со 470 шалтерски места, ќе можат да отворат сметка во Халкбанк АД Скопје, со што стануваат клиенти на банката. Со тоа добиваат можност за безготовинското плаќање на сметки и други режиски трошоци преку нивната сметка во банката со пониски провизии, но и пристап до други банкарски услуги што ги нуди Банката.

Имено, досега во Пошта преку платниот промет на Халкбанк можеа да се реализираат безготовински плаќања и плаќања во готово, вклучително и плаќање сметки за комунални услуги. Сега, со можноста за отворање на трансакциска сметка во Халкбанк преку шалтерите на Пошта, се проширува делувањето и достапноста на банкарските услуги до сите средини во чија близина нема банкарски филијали или експозитури.

Како што веќе пишувавме, минатата година речиси секоја четврта фирма ја избрала Халк банка, за своја матична банка, покажаа податоците од платформата БизнисМрежа.мк. Од 8.662 нови правни субјекти во 2021 година, 1.976 субјекти станале нови депоненти токму во Халк Банка. Халкбанк АД Скопје лани беше водечка банка и во делот на вкупен број на трансакции направени преку нивните POS терминали, вклучувајќи ја и online продажбата, со опфат од околу  30% од вкупниот број на трансакции на пазарот.

Отсега на шалтерите на Пошта, освен отворање сметка, граѓаните ќе можат да ги ажурираат личните податоци, да поднесат барање за добивање кредитна картичка, да аплицираат за кредит – потрошувачки, за пензионери, станбен, или да затворат сметка. На било кој шалтер на Пошта исто така ќе можат да поднесат барање за дозволено пречекорување што е овозможено за сите приматели на плата или пензија преку Халкбанк, за добивање пензија преку Халкбанк или за добивање дебитна картичка, за електронско банкарство, барање за СМС услуги, за студентски пакет и други банкарски услуги.