Аналитика
На Зелениот пазар во центарот на Скопје денес можат да се видат празни тезги. Од целиот пазар кромид има на две тезги, грав само на едно место и тоа поскап од предвиденото, а за леќата вели продавачот – не смеам да ја продавам. Другите видови овошје и зеленчук, чии цени не се регулирани со владините одлуки, вообичаено, ги има во изобилие.
Зелените пиперки, за кои највисоката цена е ограничена на 90 денари килограм, се продаваат по десет денари парче. И благите и лутите, иако на тој начин досега се нудеа само вториве. Денес на пазарот лути пиперки на кило има само на една тезга, и тоа со цена од 180 денари.
На продавачите им е неисплатливо во понудата да го имаат кромидот. Во претходниот период цената беше крената и до 100 денари, а денес го има малку и тоа не по 60 денари согласно одлуката на Владата, туку 80 денари килограм.
Истото е и со гравот, чија замрзната цена е 75 денари. Сепак, на единствената тезга се продава за 150, 160 и 200 денари зависно од видот. Леќата „е забранета“ по цена од 110 денари за килограм, па на пазарот воопшто ја нема.
Нема отстапувања кај доматите. Се продават по цени од 30, 50 и 70 денари, колку што е определениот лимит.
Краставиците кои можат да одат до 75, најчесто се со цена од 70 денари. Исто така, и кај карфиолот се почитува ограничувањето од 70 денари за килограм.
И бананите се со определената цена од 70 денари, исто како и лимоните – 55 денари. Портокалите се продаваат за 45, а дозволено е до 55, додека мандарините се под зацртаните 60 денари, па килограм се купува за 40 и за 50 денари.
Според најавите од Државниот пазарен инспекторат и зелените пазари ќе бидат дел од инспекциските контроли, па веројатно пазарџиите пресметале дека за нив е поисплатливо тезгите да се празни. Барем во ударните денови по стапувањето во сила на одлуката, која ќе се спроведува до 30 април.
