Охридските Хотели-Метропол очекуваат многу туристи и повеќе од 66 илјади ноќевања

Во пресрет на главната туристичка сезона, охридските Хотели-Метропол АД се надеваат на успешна година, во која ќе се реализираат повеќе од 66 илјади ноќевања. Од пансионските и услугите на плажа, од конгресниот туризам, свадбите, коктелите…, а во комбинација со зголемените цени, се очекува да повлечат приходи и добивка кои ќе бидат над минатогодишните.

Планот на Метропол е на крајот од оваа година да се изброи добивка од 394,6 илјади евра (24,321,044 денари). Во тие рамки вкупните приходи се проектирани на 193.715.098 денари, односно 3,1 милион евра, а расходите – 169.394.054 денари или 2,7 милиони евра.

Заштедите во набавките, намалената цена на енергенсите и останати импути, како и инвестициите  кои се помали од рекордните години 2018 и 2019, ќе придонесат за намалување кое ќе се прикаже кај расходната страна. Со тоа што, поради зголемувањето на минималната плата, ќе има одреден раст кај трошоците за месечните примања на вработените.

Затоа, пак, кај приходите се проектирани зголемувања по речиси сите сегменти на хотелско-угостителските услуги во однос на претходната година. Па, од Хотели-Метропол сметаат дека со секој изминат месец ќе бележат се поповолна финансиска состојба. Притоа, посочуваат, ликвидноста расте многу побрзо од претходните години, што се должи на резервациите кои почнале да се евидентираат уште од минатиот месец.

Доколку ова темпо продолжи и во наредниот период, очекувањата се дека до 2026 финансиските ефекти од работењето ќе ги достигнат рекордните вредности забележани во 2018 и 2019 година.

Со зацртаните над 66.000 ноќевања од Друштвото велат дека ќе се постигне прагот на рентабилност и позитивен финансиски резултат од редовното работење.  Притоа, цените на хотелско-угостителските услуги во просек се зголемени за 15 насто во однос на 2022. Корекцијата е направена согласно вкупните предвидени трошоци, планирате ноќевања, проектираната инфлација, а земајќи ги предвид и конкуренцијата, деловното опкружување и потребните човечки и материјални ресурси.

Инаку, ланските резултати покажуваат дека работењето на Хотели-Метропол АД Охрид се одвивало по нагорна линија. Позитивниот финансиски резултат се согледува преку нето добивката од 93,8 илјади евра (5.782 илјади денари).

Приходите иснесувале 182.349 илјади денари или 2,95 милиони евра, со што се зголемени за 55 насто споредено со 2021 година. Најголемиот прилив е од основната дејност – 2,8 милиони евра (172.819 илјади денари), што претставува натфрлање од 67 проценти.

Зголемување имало и во доменот на расходите. За 33 насто пораснале расходите од работењето – 2,85 милиони евра. Тука, најголемо учество од 38 проценти имаат трошоците за вработените – 1,09 милиони евра  и во однос на претходната 2021 зголемувањето е за 29 проценти.