Аналитика
Американскиот претседател Доналд Трамп повторно ја разниша глобалната трговија, најавувајќи серија нови казнени царини што ќе стапат на сила на 1 октомври. Потегот предизвика вознемиреност кај меѓународните партнери и силни потреси на берзите во Азија, потсетувајќи дека Белата куќа ја користи трговијата како едно од своите најмоќни политички оружја.
Според најавата, на удар ќе бидат неколку клучни индустрии. Фармацевтските компании ќе се соочат со царина од 100% за брендирани и патентирани лекови, освен ако не започнале со изградба на производствен погон на американско тло. За кујнските и тоалетните елементи стапката ќе изнесува 50%, а за тапацираниот мебел 30%. Новиот режим предвидува и 25% тарифа за тешките товарни возила – мерка што Трамп ја оправдува со потребата да се заштитат домашните производители од „нефер конкуренција“.
„Овие даноци се прашање на национална безбедност и на враќање на работните места дома“, напиша претседателот на Truth Social, објаснувајќи дека прекумерниот увоз на мебел и кујнски производи го „преплавил“ американскиот пазар. Тој повтори дека токму ваквите мерки ќе му дадат нова сила на традиционалниот бизнис со мебел во Северна Каролина, Јужна Каролина и Мичиген.
Но додека Трамп зборува за ренесанса на американската индустрија, деловните здруженија во земјата предупредуваат на негативни последици. Американската стопанска комора побара владата да се воздржи од нови царини за камионите, потсетувајќи дека петте најголеми извозници – Мексико, Канада, Јапонија, Германија и Финска – се сојузници и блиски партнери на САД и не претставуваат закана за националната безбедност.
Веста од Вашингтон веднаш се одрази на финансиските пазари. Акциите на фармацевтските компании низ Азија тргнаа надолу: јапонскиот индекс на фармацевтски компании Топикс се затвори со пад од 1%, индексот на иновативни лекови во Хонг Конг изгуби 2,8%, а акциите на јужнокорејската SK Biopharmaceuticals паднаа за 2,7%. Австралиската CSL изгуби 1,6% по претходен пад од над 3%. На удар се најде и мебелската индустрија – индексот што ги следи кинеските производители забележа пад од 1,1%.
Новите мерки се само последна епизода во долгата стратегија на Трамп за користење на царините како алатка за притисок во меѓународните односи. Претходно, неговата администрација воведе давачки врз челикот, алуминиумот, автомобилите и полупроводниците, секогаш оправдувајќи ги со аргументот на националната безбедност. Сепак, постојните трговски договори со Европската Унија, Јапонија и Обединетото Кралство предвидуваат ограничувања за царините на одредени производи, па останува неизвесно дали и колку новите мерки ќе се применуваат врз партнерите со кои САД имаат склучено билатерални спогодби.
Во меѓувреме, германските компании – особено производителите на фармацевтски производи и автомобили – стравуваат од нов бран на притисок врз нивниот најважен извозен пазар. Азија веќе ја почувствува првата бранувачка реакција, но вистинската тежина на царините ќе се измери дури кога тие ќе стапат во сила и ќе почнат да ги менуваат трговските текови на глобалната економија.
