Аналитика
Нема ден без нетрговски трансфер на акции. Минатата работна седмица се наследени, подарени… акции од осум фирми и четири банки, вкупно 4.011. Освен 105 приоритетни на Стопанска банка Скопје, сите други се обични акции.
Овојпат, како победник на неделата може да се смета „Тетекс“. Повеќе од половината трансферирани акции се издадени од оваа компанија – 2.843. Всушност, средата била во нивниот знак. Истиот ден низ овој процес минале и 44 обични акции на ТТК банка, каде што тетовци се главниот, односно најголем акцонер.
Меѓу поредовните во нетрговските трансфери се хартиите од вредност на струмичките „Оранжерии Хамзали“ и „Кланица со ладилник“. Последно, се работи за 294, односно 138 обични акции.
Според податоците од Централниот депозитар за хартии од вредност што ги објавува Македонска берза, скопскиот градежник „Гранит“ минатата недела бил застапен со 247 обични акции.
Во нетрговскиот трансфер се забележани и 149 акции на ГТЦ АД Скопје. А, на Попова Кула АД Демир Капија – 70 обични акции.
Често ги има и акциите на „Макстил“, сега 50. Исто како и на „Макпетрол“, а во минатонеделната тура се 15 обични акции.
Од банките, акциите на Комерцијална се трансферирани на двапати – 40 плус четири. А, во текот на последниот работен ден во нетрговскиот пренос се забележани и 12 обични акции на Стопанска банка Битола.
