Аналитика
Илон Маск би можел да стане првиот човек во историјата со лична нето вредност од еден трилион долари, доколку акционерите на „Тесла“ го одобрат новиот план за компензација и компанијата ги исполни агресивните цели во следната деценија.
Според предлогот што го објави одборот на „Тесла“, Маск би добил стотици милиони дополнителни акции ако ја зголеми пазарната капитализација на компанијата на 8,5 трилиони долари – сума што ја надминува комбинираната вредност на технолошките гиганти „Мета“, „Мајкрософт“ и „Алфабет“.
Доколку планот биде усвоен и целите се постигнат, Маск би добил дополнителни 423,7 милиони акции на „Тесла“, што би можело да додаде околу 900 милијарди долари на неговото тековно богатство. Со моментална нето вредност од приближно 430 милијарди долари, тој би го удвоил своето лично богатство и би ја надминал историската граница од трилион долари.
За целосната исплата, „Тесла“ ќе треба да ја зголеми својата пазарна капитализација од сегашните 1,1 трилион долари на 8,5 трилиони. Целите опфаќаат комерцијална употреба на еден милион роботакси и испорака на еден милион хуманоидни роботи во рок од десет години – технологии за кои компанијата верува дека ќе ја редефинираат иднината на транспортот и работната сила.
„Задржувањето и стимулирањето на Илон Маск е од фундаментално значење за „Тесла“ да ги постигне овие цели и да стане највредна компанија во историјата“, наведуваат членовите на одборот Робин Денхолм и Кетлин Вилсон-Томпсон во писмо до акционерите.
Иако Маск моментално поседува 19,7 проценти од акциите во „Тесла“ и има значителни удели во „SpaceX“ и xAI, неговиот краток мандат како дел од администрацијата на Доналд Трамп и падот на продажбата на европскиот пазар во 2025 година влијаеле врз профитот на компанијата. Сепак, инвеститорите сметаат дека репутацијата на „Тесла“ може да се обнови преку нови производи и технолошки пробиви.
Маск, пак, останува оптимист: „Иднината на компанијата е базирана на автономни возила и хуманоидни роботи произведени во огромни количини и по ниска цена. Со добра изведба, Тесла ќе стане убедливо највредната компанија во светот.“
Гласањето за новиот пакет компензации ќе се одржи на годишниот состанок на акционерите на „Тесла“ на 6 ноември. Доколку биде одобрен, компанијата правно ќе биде обврзана да му додели на Маск стотици милијарди во акции, условено од исполнување на амбициозните цели.
