НИКОЛОСКИ: СЕ ОТВОРА ПАТОТ ЗА ЖЕЛЕЗНИЧКО ПОВРЗУВАЊЕ СО БУГАРИЈА откако соседната земја го ратификуваше договорот за железнички тунел

Народното Собрание на Република Бугарија го ратификуваше Договорот помеѓу Македонија и Бугарија за изградба на меѓуграничен железнички тунел на Коридорот 8, информираше министерот за транспорт и вицепремиер Александар Николоски на својот Фејсбук профил. 

Претходно, во декември минатата година овој договор во беше ратификуван и во македонското Собрание.

Со ова, како што нагласи министерот, се исполнети сите услови за доизградба на железничкото поврзување помеѓу Скопје и Софија и Бургас.

„Горд сум што овој Договор кој го потпишавме на 6ти Ноември со заменик претседателот на Владата на Бугарија Гроздан Караџов ќе значи поблиски економски врски помеѓу двете држави и двата народи, но покажува и силна посветеност на Македонија во реализација на Коридор 8 кој е исклучително значаен безбедносен коридор од висок интерес на НАТО и нашите стратешки партнери“, истакнува Николоски во својата објава.

Паралелно го развиваме и Коридор 10 и Македонија ја правиме вистинска раскрсница на Балканот за добробит на сите македонски граѓани, додаде министерот за транспорт и врски.