Аналитика
Областа околу аеродромот Никос Казанѕакис во Ираклион на Крит денес наликуваше на воена зона, откако земјоделците и сточарите ги ескалираа своите протести, јавува грчкиот весник То Вима. На местото на настанот владееше тензија, при што полициските сили користеа хемиско оружје – солзавец и чадни бомби. Судирите меѓу земјоделците и полицијата за немири на Крит резултираа со повредени и материјална штета, вклучително и превртени полициски возила, јавија локалните медиуми.
На крајот, земјоделците успеаја да влезат во пистата на аеродромот, што резултираше со прекин на неговото работење.
Летовите до и од аеродромот Ираклион на Крит денес се суспендирани откако земјоделците кои протестираат влегоа во аеродромскиот простор и се упатија кон платформата, принудувајќи ги властите да ги прекинат операциите. Сликите од локалните медиуми покажаа десетици земјоделци како стојат на платформата на Меѓународниот аеродром Никос Казанцакис во Ираклио, главниот град на Крит.
Службеник на аеродромот за Ројтерс изјави дека сите летови се запрени во 14 часот, а објектот ќе остане затворен до понатамошно известување. Друг официјален претставник рече дека демонстрантите преминале во ходниците за летови.
Локалниот медиум neakriti.gr објави дека најмалку два дојдовни лета – еден од Атина и друг од Родос – биле принудени да се вратат на своите аеродроми за заминување откако не можеле да слетаат.
Аеродромот во Ираклион на својот Фејсбук профил пред еден час го објави следново: „Протестите на земјоделците и сточарите околу Ираклион продолжуваат. Земјоделците повторно ја отворија пистата , но остануваат со своите трактори на аеродромот. Важно за сите што патуваат во следните неколку дена: Планирајте повеќе време за патувања до Ираклион – особено ако треба да стигнете до аеродромот. Очекувајте спонтани затворања или пренасочувања во секое време. Протестите можат да траат неколку дена“, се вели во написот на аеродромот во Ираклион на Крит.
Немири беа пријавени и на аеродромот Ханија, каде што земјоделците успеаја да го блокираат главниот влез околу 14:30 часот. Затворањето ги спречи патниците, посетителите и туристите да влегуваат или излегуваат, освен во случаи на медицински потреби.
Во обид да ги спречи демонстрантите да се приближуваат кон аеродромот, полицијата употреби солзавец. Демонстрантите одговорија со фрлање камења, а подоцна и со превртување на полициско возило. Според државната телевизија ЕРТ, еден полицаец бил повреден за време на судирите. Ситуацијата останала нестабилна до попладнето.
Земјоделците рекоа дека нивниот почетен план бил да ја блокираат главната порта на аеродромот од 14:00 до 16:00 часот како дел од нивните тековни демонстрации. Сепак, тие тврдеа дека полициската интервенција ги натерала да ги ескалираат своите акции, на крајот целосно прекинувајќи го пристапот до аеродромот.
На други места, земјоделците блокираат патишта низ целата земја, додека ги засилуваат протестите започнати откако истрагите за корупција доведоа до одложување на субвенциите од Европската Унија.
Илјадници камиони учествуваат во најмалку 20 блокади.
Премиерот Киријакос Мицотакис, чија популарност на владата е нарушена од спорот, ги повика земјоделците да ги прекинат блокадите. „Владата е отворена за дијалог“, рече тој.
Европските обвинители во февруари тврдеа дека илјадници земјоделци, потпомогнати од државни службеници, со години лажно поседувале земјиште и добиток за да се квалификуваат за средства од ЕУ.
Владата вети дека ќе ја реформира државната агенција ОПЕКЕПЕ, која се занимава со субвенциите од ЕУ. Грчките власти, исто така, започнаа сопствена истрага за апликациите и даночните евиденции на земјоделците.
Владата соопшти дека се проверуваат повеќе од 40.000 апликации на земјоделци. Во меѓувреме, таа вети дека ќе им распредели 3,7 милијарди евра на земјоделците оваа година, но ги призна доцнењата во плаќањата.
На север, земјоделците го прекинаа сообраќајот на граничните премини Евзони, Промахонас и Кипи со Северна Македонија, Бугарија и Турција, соодветно. Царински службеник на контролниот пункт Кипи изјави дека само камиони со чувствителна стока смеат да преминуваат.
Блокади на патиштата беа поставени и во југозападна и централна Грција, каде што земјоделците рекоа дека имаат за цел да го блокираат пристаништето Волос оваа недела.
(Фото: Greek police, Athens Indymedia which is licensed under CC-BY-SA 2.0.)
