Аналитика
Низ нетрговските трансфери минатата недела минале 4.716 обични акции. Издадени се од 17 фирми. И од една банка – Стопанска Битола застапена со десет обични акции. Ударен ден за оваа активност била средата со 3.485 акции. А, повторно најбројни, овојпат 929, се акциите на „Либерти“ АД Скопје.
Акциите на „Македонски телеком“ во нетрговските трансфери се среќаваат во два наврати. Сопственоста е пренесена кај вкупно 786 акции, со динамика 410 плус 376, покажуваат податоците од Централниот депозитар за хартии од вредност што ги објавува Македонска берза.
На двапати се трансферирани и акции на „Макпетрол“ и на „Раде Кончар – Апаратна техника“. Кај акциите емитувани од дистрибутерот на горива се работи за вкупно 89. Прво биле пренесени 59, потоа 30.
Во вторникот сопственоста е променета на 63 акции на „Раде Кончар – Апаратна техника“, а во средата на 101. Или вкупно 164 обични акции.
Најмалубројни се акциите на прилепска „Витаминка“. Минатата недела биле подарени, наследени… седум обични акции.
Двоцифрени се трансферите со 13 обични акции на РЖ „Техничка контрола“, 30 на РЖ „Економика“, 32 на РЖ„ Интер-Трансшпед“ и 34 на „Уготур“.
Прагот над сто први го минале 105 акции на „Окта“. Следуваат 164 обични акции на Тутунски комбинат АД Прилеп, 179 на „Гранит“, 261 на РЖ „Услуги“, 277 на кумановската ФЗЦ „11 Октомври“ и 309 на „Макошпед“.
Со над 500 акции се уште два нетрговски трансфери: со 617 хартии од вредност издадени од „АрцелорМиттал“ (ХРМ) АД Скопје и 710 на „Макстил“.
