Норвешка во рецесија: Пад на БДП од 6,3 проценти

Бруто домашниот производ на Норвешка, забележа најголем пад во вториот квартал на 2020 година со највисока стапка регистрирана досега.

Итните вонредни мерки за контрола и спречување на ширењето на коронавирусот ја втурнаа земјата во најдлабока рецесија во својата историја, покажаа најновите податоци од Националното биро за статистика (СББ).

Економијата во континенталниот дел на Норвешка, која го исклучува производството на нафта и гас, во периодот од април до јуни се намали за високи 6,3 проценти во однос на претходниот квартал, пренесува „Reuters“.

„Падот на норвешката економија во вториот квартал е најголем во историјата, односно од 1978 година, кога почнаа да се чуваат квартални записи за движењето на БДП“, соопштија од Националното биро за статистика (СББ).

Ова е втор последователен квартален пад на БДП во Норвешка во тековната година, откако во првиот квартал се намали за 2,2 проценти, што значи дека земјата влезе во длабока рецесија.