Аналитика
„Обликување на платежните иновации“ е насловот на Конференцијата за плаќањата и пазарната инфраструктура, која по петнаесетти пат ја организираат Народната банка на Република Македонија и Централната банка на Холандија, а ќе се одржи во Охрид од 29 до 30 јуни. Со ова ја продолжувааат долгогодишната традиција на заедничко согледување на можностите и предизвиците кај платежните услуги преку отворена и плодна дискусија.
Јакнење на финансиската рамка на патот кон Единствената европска платежна област ̶ СЕПА преку поврзување на платежната инфраструктура на Западен Балкан со инфраструктурата на Европската унија, дигиталните валути на централните банки ширум светот, тековните состојби, очекувањата и стратегиите поврзани со нив, отвореното банкарство и иднината на финансиските услуги кои се во согласност со финтек, се дел од темите на кои ќе дебатираат претставници на голем број централни банки, деловни банки, небанкарските даватели на платежни услуги и други институции. Со свои обраќања Конференцијата ќе ја отворат гувернерката на НБРСМ, Анита Ангеловска-Бежоска и директорката на Секторот за плаќање и пазарна инфраструктура во Банката на Холандија, Инге ван Дијк. Ќе учествуваат претставници на Европската централна банка и на централните банки од земјите на ЕУ и од регионот, Банката за меѓународни порамнувања, Европскиот совет за плаќања, домашните финансиски регулатори, домашниот банкарски сектор, како и домашните и странските институции од финтек-секторот кои се засегнати страни во доменот на платежните услуги.
Конференцијата за плаќањата и пазарната инфраструктура низ годините прерасна во платформа за размена на знаења и искуства за актуелни теми од областа на плаќањата и промовирањето нови идеи, додека Народната банка презема бројни активности за модернизација на постојната платежна инфраструктура преку примена на технолошките новитети.
Конференцијата, која ќе се одвива на англиски јазик, ќе може да се следи на youtube каналот на Народната банка: https://www.youtube.com/watch?v=VsMJIeEnkcE
