МУКАЕТОВ ГО ЗАЈАКНУВА СВОЈОТ АКЦИОНЕРСКИ КАПИТАЛ ВО „АЛКАЛОИД“ – добар сигнал испратен за инвеститорите

Првиот човек на нашата најголема фармацевтска компанија Живко Мукаетов, генерален директор на Алкалоид  купи нови 400 обични акции во друштвото.

Компанијата Алкалоид, преку Македонска берза извести дека Живко Мукаетов, Претседател на Управниот одбор и Генерален директор на Алкалоид АД Скопје, се стекна со 400 обични акции издадени од Алкалоид АД Скопје.

КОЛКУ АКЦИИ КУПИ МУКАЕТОВ ГОДИНАВА

Ова е четврти пат годинава, првиот човек на Алкалоид да купи акции во компанијата кој тој ја управува по оние во мај и јуни месец, кога Мукаетов купи по 600 обични акции во друштвото, и онаа во март кога купи 400 обични акции.

Исто така и Членовите на Управниот одбор на Алкалоид АД Скопје во континуитет вложуваат во акцијата на Алкалоид, и тоа е позитивна корпоративна пракса.

АКЦИЈАТА НА АЛКАЛОИД ВО ТОП 3 НАЈТРГУВАНИ АКЦИИ НА БЕРЗА

Акциите на Алкалоид АД Скопје котираат на официјалниот пазар на Македонската берза за хартии од вредност од 2002 година и важат за едни од најтргуваните и најликвидни акции на берзата.

Минатиот месец, алкалоидовата акција се најде како втора најтргувана акција на официјалниот пазар на Берзата каде количински се истргувани 2.646 акции по просечна цена од 16.966,98 денари. Вкупниот промет што во Јули беше достигнат со акциите на „Алкалоид“ изнесувал 729.545 евра или 44.894.634 денари, а неговото учество во вкупниот промет изнесувало 24,50 отсто.

Оваа година алкалоидовите акции се најдоа седум месеци по ред во ТОП 3 НАЈТРГУВАНИ АКЦИИ на берзата.

Во 2021 година, алкалоидовата акција се најде на високото второ место од ТОП 3 НАЈТРГУВАНИ АКЦИИ каде, количински беа истргувани 51.115 акции по просечна цена од 15.799,55 денари и се свртеле 13.131.607 евра или 807.593.833 денари.

КАКО РАБОТИ АЛКАЛОИД ВО ПРВИТЕ ШЕСТ МЕСЕЦИ ОД ГОДИНАВА

АЛКАЛОИД со раст на консолидираните продажби од 14 %, со 127 нови вработувања во земјава, инвестиции од 8 милиони евра и раст на консолидираната нето-добивка за 11% во периодот јануари – јуни 2022 г.

Исто така, Алкалоид се пофали дека го проширува своето портфолио на производи и на јужноамериканскиот пазар.

Редакција Пари