Мета истражува дали поранешната директорка на Facebook, Шерил Сандберг ја злоупотребувала позицијата

Мета, наводно, ги истражува наводите дека Шерил Сандберг, која беше директорка на Фејсбук 14 години пред да поднесе оставка на 1 јуни, користела ресурси на компанијата за лична корист. Волстрит Журнал известува дека, според анонимни извори, истрагата на Мета „е во тек барем од минатата есен“ и го разгледува „однесувањето од неколку години наназад“.

Истрагата, наводно, се однесува на наводите дека Сандберг ги користела ресурсите на Фејсбук за да ја поддржи нејзината фондација Lean In, да помогне во маркетингот за нејзината втора книга и да ја планира нејзината претстојна венчавка со извршниот директор на Kelton Global, Том Бернтал, меѓу другото.

Мета не одговори веднаш на барањето за коментар. Портпаролот на Сандберг претходно изјави за Журнал дека „Шерил не ги користела несоодветно ресурсите на компанијата во врска со планирањето на нејзината венчавка“. На останатите наводи не беше одговорено.

Сандберг во објавата на Фејсбук во која ја објави нејзината оставка напиша дека „ќе се фокусирам повеќе на мојата фондација и филантропска работа, што ми е поважно од кога било со оглед на тоа колку е критичен овој момент за жените“, и дека ќе остане во одборот на директори на Мета.