Маск во ноември донирал акции во Тесла „тешки“ 5,7 милијарди долари во хуманитарни цели

Извршниот директор на Тесла, Илон Маск, донирал вкупно 5.044.000 акции од најбогатиот светски производител на автомобили во добротворна организација во ноември минатата година. Во моментот кога била предадена, донацијата вредела 5,74 милијарди долари, врз основа на затворачките цени на акциите на Тесла во петте дена кога тој ги донира акциите. Американската Комисија за хартии од вредност, која го објави овој податок, не го откри името на добротворната организација која ја добила донацијата.

Донацијата дојде во време кога милијардерот продаде акции во вредност од 16,4 милијарди долари по анкетата на корисниците на Твитер за ослободување од 10% од својот удел во производителот на електрични автомобили на почетокот на ноември. Тој на Твитер рече дека ќе плати повеќе од 11 милијарди долари даноци во 2021 година поради неговото користење на опциите за акции што истекува оваа година.

Маск беше критикуван од политичарите Берни Сандерс и Елизабет Ворен кои ги повикаа богатите луѓе да плаќаат повеќе даноци. Аналитичарите велат дека би имало даночна поволност за Маск што потенцијално ќе ги подарува акциите на Тесла, бидејќи акциите донирани во добротворни цели не подлежат на данок на капитална добивка, како што би биле доколку се продадат.

„Неговиот даночен бенефит би бил огромен“, вели Боб Лорд, соработник во Институтот за политички студии кој ја проучува даночната политика.

„Тој би заштедил помеѓу 40% и 50% од данокот од 5,7 милијарди долари, во зависност од тоа дали би можел да го земе одбитокот од неговиот приход од Калифорнија и дали би го избегнал данокот на добивка што би требало да го плати доколку ги продаде акциите. ”

Лорд додаде дека Маск можеби ги придонел акциите на посредници како што се „фондовите советувани од донатори“, а не директно за добротворни групи.

Фондација Маск

Донацијата го рангира Маск како втор најголем донатор во Америка по Бил Гејтс и Мелинда Френч Гејтс минатата година, покажуваат податоците од Хроника на филантропијата.

Јавните филантропски гестови на Маск досега ги следеа другите милијардери. Маск и основачот на Амазон,  Џеф Безос, донираа помалку од 1% од нивната нето вредност, додека Ворен Бафет и Џорџ Сорос дадоа повеќе од 20% до почетокот на септември, според деловниот магазин Форбс.

Маск е претседател на Фондацијата Маск, која нуди грантови за „развој на безбедна вештачка интелигенција во корист на човештвото“, како што стои на нејзината веб-страница. Минатата година Маск и фондацијата понудија награди од 100 милиони долари на оние кои можат да смислат технологија која ќе помогне да се отстрани јаглеродот од атмосферата.

Лани сопственикот на Тесла се пофали дека донирал 20 милиони долари за училиштата во округот Камерон, Тексас, локацијата на полигонот за лансирање на ракетите„Спејс Икс“ и 10 милиони долари за градот Браунсвил.

Маск флертуваше и со поамбициозни цели за филантропија. Ако Светската програма за храна на Обединетите нации може да објасни точно како 6 милијарди долари ќе го решат проблемот со гладта во светот, јас ќе ги продадам акциите на Tesla токму сега и ќе го сторам тоа“, напиша Маск лани на Твитер, одговарајќи на молбата за донација од Дејвид Бисли, извршен директор на Светската програма за храна.

Во јануари минатата година, тој им постави прашање на корисниците на Твитер за „начините за донирање пари што навистина прават разлика“, со коментар дека тоа е „потешко отколку што изгледа“.