„Макпетрол“: И со многу минуси бизнисот со горивата е во плус

Пад од 32,8 отсто е забележан кај добивката на „Макпетрол“ по одработените три годинешни тримесечија. Износот пред оданочување е 727.717 илјади денари, односно 11,8 милиони евра. Големи бројки, кои претходно, во споредбениот лански деветмесечен период, биле уште поголеми – речиси 17,6 милиони евра. Или, кога стабилна компанија минува низ одредена негативна фаза, не е прашањето дали воопшто ќе има профит, туку за колку ќе биде намален.

Разликата од над 5,7 милиони евра (355,18 милиони денари) најголемиот домашен дистрибутер на горива ја образложува со намалувањето забележано кај големопродажбата на енергенсите – за 35,86 отсто. И, со нестабилноста на цените на нафтата на светските берзи. Воедно, тука е и влијанието од зголемувањето на платите на вработените.

Притоа, во трите квартали се остварени вкупни приходи од близу 372 милиони евра (22.919.522 илјади денари), кај кои има минус од 18,28 проценти во однос на минатогодишните 455,2  милиони евра. Оперативните приходи се во негатива од 18,15 отсто и се во износ од 370,3 милиони евра. Приходите, пак, од продажбата – 368 милиони евра, имаат намалување од 18,08 проценти во однос на состојбата од крајот на ланскиот септември. Тоа е одраз од потфрлувањата во продажбата на природен гас – за 35,53, како и на млазното гориво од 48,5 проценти.

Воедно, од омпанијата наведуваат дека во неповолни економски услови, во деветмесечниот период бил зголемен количинскиот промет со нафтени деривати на мало за 6,73 насто, а проширен е и малопродажниот асортиман на бензинските станици, при што прометот има раст од 16,27 проценти. Сепак, приходите на мало бележат пад од 6,07 отсто, како резултат на намалувањето на цените на нафтените деривати на светските берзи.

Истовремено, минуси се бележат и кај расходите, чиј вкупен износ од 360,1 милион евра е намален за 17,7 проценти. Исто така, за 17,67 отсто се пониски оперативните трошоци (359,9 милиони евра).

Од „Макпетрол“ посочуваат дека и покрај сите предизвици, и покрај опаѓањето на нивото и кај приходите и кај добивката, сепак резултатите се над планираните.