Македонските можности претставени во Франкфурт: Интересот на бизнисмените најавува нови инвестиции

Германските компании ќе продолжат активно да учествуваат во технолошкото унапредување, одржливиот раст и развој на нашата економија, на што укажува интересот пројавен од претставниците на германската бизнис заедница. Ова од Франкфурт го порача вицепремиерот задолжен за економски прашања, Фатмир Битиќи, кој на тркалезна маса, заедно со директорот на ДТИРЗ, Јован Деспотовски, ги претставија можностите за инвестирање во Македонија, како и за владините мерки и поддршката наменета за странските инвеститори.

„Го истакнавме високото ниво на економска соработка помеѓу Северна Македонија и Германија, како одлично искуство и за понатамошно зголемување на бројот на германски компании, кој е повеќе од 200, кои имаат реализирано инвестиција и вработуваат над 22.000 граѓани, на кои редовно им се исплатуваат конкурентни плати“, изјави Битиќи.

Тој посочи дека германските компании се од голема помош во делот на прилагодувањето на стандардите во македонската економија со тие на ЕУ.

„Зборуваме за технолошки напредни компании, етаблирани на глобалните пазари, кои своите успеси не ги темелат на евтина работна сила, туку на човечки ресурси кои се одликуваат со напредно знаење, иновативност, со изградени вештини да бидат дел од најсовремени технолошко производствени процеси“, изјави Битиќи.

Директорот на ДТИРЗ, акцентира две клучни пораки од средбите со германските компании.

„Прво дека Северна Македонија е стабилна држава, мала но флексибилна, која може да се прилагоди на барањата на инвеститорите, а тоа истовремено да е во корист на граѓаните, и второ, уште поважно, дека во земјата имаме вредни и трудољубиви луѓе. Но, нашата јасна порака е дека тие треба се платат и она што ме радува е дека високи плати повеќе за кои ние се залагаме се сѐ поприфатливи за компаниите. Сега во фокусот се вештините на младите“, рече Деспотовски, и најави нови германски инвестиции.

Антје Ванделт, директор на АХК Северна Македонија, дел од мрежата на германските стопански комори во странство, информираше дека 25 германски компании беа дел од тркалезна маса која се одржа во германската комора во Франкфурт. Главно од финансискиот сектор, металопраработувачка индустрија, ИТ секторот и инвестициски консалтинг, а сите се позитивно изненадени од можностите кои ги нуди државата.

„Најмногу се интересираа за едуцираниот кадар, инфраструктурата, и за кадарот со стручно образование. Дел од компаниите веќе се присутни на пазарот и се интересираат за понатамошни можности, за дел од нив земјата е нов пазар кој разбуди сериозен интерес“, изјави Ванделт.

Инаку, во рамки на престојот во Германија, вчера во Франкфурт беше потпишан договор со компанијата за производство на литиум-јонски батерии БМЗ, за реализација на нова инвестиција која ќе обезбеди над 750 нови вработувања.